呢個世界真係面皮夠厚，夠自我中心的話就做乜都得（自以為）。日前一套中國製作嘅科幻電影《天馬行空》（Unstoppable）推出宣傳海報，然後一望之後竟然發然微軟旗下大作《Halo》（最後一戰）系列主角「士官長」係封面人物，呢件事極速係世界各大論壇（如 Reddit）引起討論，就連中國嘅論壇都唔例外。

電影海報嘅設計同《Halo》（最後一戰）入面嘅概念美術圖已經超越咗「相似」、「致敬」嘅範疇，士官長所有輪廓、細節，就連手上面支槍都完全一樣，因為佢哋直頭將原圖褪地再鏡像就直接放落去海報入面，作風非常大膽進取！

面對呢種擺明係侵權嘅行為，唔只外國網友，就連中國嘅論壇都有人叫微軟出手控告（外國網友寸到用「inspiration」呢個字）。雖然暫時唔見微軟採取法律行動，但係佢哋官方微博就出咗個 Status：「《最後一戰》的故事並不『天馬行空』，士官長的傳奇將在今年冬季的《最後一戰：無限》中繼續。」，以幽默方式應對。

除咗對微軟有侵權行為，細心一睇之下仲會發現喺電影標題嘅「空」字入面驚見知名電腦品牌「Alienware」嘅外星人 Logo，不過暫時就未見 Dell 有所回應。

咁到底呢套電影係咩黎？

呢套電影由大家熟悉嘅武打明星樊少皇主演，由夢想國際影業（北京）出品，電影講述 2080 年地球成為太空移民聚集地「星際城」，點知天馬座流星雨殺到埋黎，然後唔知點解係由一支任務小隊企出黎拯救地球，而敵人就係昆蟲類型嘅外星人，目前已喺中國橫店開拍。

估唔到係真野……齋睇海報仲以為係吹水多，真係你夠膽做就得。

提提大家，Xbox 大作《Halo Infinite》（最後一戰：無限）預計於 2021 年底上市，對應平台為 Xbox Series X|S 及 PC。