【遊戲介紹】過癮小品泊車遊戲 《You Suck At Parking》極考技術爽快難度兼備

要泊車泊得好唔係簡單嘅事,不過係《You Suck At Parking》入面,想泊好架車絕對係超難!呢款獲得多個獎項嘅小品遊戲,以極限泊車為主題,挑戰你駕駛技巧同時極富速度感,更不乏各種搞笑設計,現時更提供免費試玩,真係不能錯過!

 

 

《You Suck At Parking》由比利時獨立工作室 Happy Volcano 開發,係一款競速泊車遊戲,支援最多單機四人遊玩。遊戲玩法極簡單,只要喺限時內將車泊喺停車框框內就可以。遊玩過程中路上會出現大量阻礙你前進嘅機關,包括其他車輛、地雷、大風扇、加速器、傳送門等等,玩家要利用漂移、跳躍等技巧,飛馳於蜿蜒曲折嘅賽道,然後你會發現泊車其實好難!

 

 

如果你嫌原有關卡賽道唔夠痴線唔夠挑戰性,本作有附設關卡編輯器,玩家可自行設計關卡,之後可以同其他玩家分享「一齊捱」。(免費試玩版中並不包括關卡編輯器)

 

 

《You Suck At Parking》預計於 2022 年推出,對應版本為 PC Steam,現時 Steam 商店頁面正提供免費試玩版,有興趣嘅朋友可下載挑戰。

五木

動漫電玩宅,極愛金田一系列,擅長動作及策略遊戲

追蹤

更多文章