【硬件情報】新型掛頸式揚聲器 「SC-GN01」FF XIV 團隊設計不再箍頭

今時今日打機用 Headset 已經係基本配置,話晒可以聽腳步聲方位,又可以同隊友溝通。但無論係邊款 Headset 都有同一個問題,就係配戴時間耐咗點都會有啲箍住+侷促嘅感覺。日前 Panasonic 就宣布即將推出一款新型掛頸式揚聲器「 SC-GN01 」,不但完美重現遊戲中音效,更唔會令玩家有重量負擔,打足成日都無問題!

 

 

SC-GN01 係首款頸掛式 4 聲道環繞揚聲器,採用 TRUE MAGESS 系統,透過前 2 後 2 排列嘅四個 3cm 喇叭重現音效,令玩家可以清晰聽到四週動態聲音。根據系統描,SC-GN01 為能夠提供 4W RMS 總輸出功率(1kHz、THD 10%、6Ω、20kHz LPF 下測量),重量則只有 244g,可舒適地放於肩膀上,並且長時間使用都唔會令身體或聽力感到疲勞。

 

 

SC-GN01 採用有線連接,可以直接用 USB 線(3米長)連接 PC、PS4、PS5、Nintendo Switch(Dock),另外有 3.5mm 可以插 Xbox、Nintendo Switch(手提 Mode)及其他裝置,不過要另外插 USB 供電,比較麻煩。

至於收音方便,由於內置高性能降噪以及迴音消除雙 MEMS 麥克風系統,玩家可與其他人清晰地對話,並不會受到強大聲效所干擾,而機身上有按鈕可以一鍵 Mute 咪或靜音遊戲聲效,非常方便。

 

用 3.5mm 要另外插多條 USB 線拎電,有啲麻煩

 

 

SC-GN01 係 Panasonic 同《 Final Fantasy XIV 》音效團隊共同開發,設有三種針對不同遊戲類型嘅模式,有強調真實感與強度嘅「RPG 模式」(有為 FFXIV 做強化調整);提供準確音頻定位令玩家掌握腳步聲等細微聲音嘅「FPS 模式」以及增強人聲並進一步令玩家親歷其境嘅「Voice 模式」。另外仲有強調 3D 音效嘅「電影模式」以及聽歌用嘅「音樂模式」,功能全面。

 

 

SC-GN01 預計於 10 月 22 日正式發售,售價大約 21,780 日圓,大約係港幣 $1,543,詳情可到官網查詢

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章