【遊戲新聞】不再延期承諾食言 《Dying Light 2》再度延期至明年年初並保證有驚喜

萬眾期待嘅喪屍大作《Dying Light 2 Stay Human》(垂死之光 2 堅守人性)喺上年極多負面消息以及多次延期後,講到明會喺 2021 年 12 月 7 日發售,並聲言絕不延期。隨住發售日越來越近,官方竟然又再宣佈延期至明年年初,再度食言令人失望。

 

 

開發商 Techland 日前喺官方 Twitter 以 CEO Pawel Marchewka 名義發表公告,內容係《Dying Light 2 Stay Human》將延期到 2022 年 2 月 4 日。公告內容提及遊戲已經接近完成,目前正進行內部測試,而本作係佢哋最龐大同時亦最具野心嘅作品。亦因為咁,喺接近完成遊戲時發現品質未如理想,需要更多時間為遊戲調整,所以先決定再度延期同時為等待中嘅玩家致歉。

文中亦有提及下月開始,各大新聞媒體及內容創作者會陸續收到遊戲以及通過活動同大家分享相關經驗,並且會於九月下旬有驚喜消息公佈,相信係指東京遊戲展 2021,敬請期待。

 

《Dying Light 2 Stay Human》係一款融合跑酷 + 生存玩法嘅動作生存遊戲,採用第一身視點。特別之處係今集劇情更會好似《Detroit》咁,會因應唔同既選項改變劇情走向。可以選擇強奪、合作等方式去與 NPC 勢力交涉,當然玩家嘅每個選項都會影響後續既劇情,亦都因為呢點令玩家更為期待。

 

 

《Dying Light 2 Stay Human》預計於 2022 年 2 月 4 日發售,對應平台為 Xbox Series X|S、Xbox One、PS5、PS4 及 PC Steam & Epic Games Store。

五木

動漫電玩宅,極愛金田一系列,擅長動作及策略遊戲

追蹤

更多文章