【遊戲評測】輕鬆體驗格鬥快感 《鬼滅之刃 火之神血風譚》故事與對戰模式各有趣味

《鬼滅之刃》一直人氣高企,啱啱更推出《無限列車篇》電視版,年尾仲有第二季動畫《遊郭篇》,相信會繼續 Keep 住強勢。動畫精彩,自然令人有親身落場斬鬼嘅慾望,早前推出嘅《鬼滅之刃 火之神血風譚》就絕對係不二之選,遊戲不論故事定係對戰模式都做得非常唔錯,雖然分類係格鬥遊戲,但係入門門檻極低,就算係新手都會感受到箇中樂趣。

 

 

《鬼滅之刃 火之神血風譚》由 CyberConnect2 開發,Aniplex 製作,SEGA 發行,係一款立體格鬥遊戲,不過官方就稱之為「鬼殺對戰動作遊戲」。故事模式「火之神血風譚」由炭治郎受訓到加入鬼殺隊、搵出拯救妹妹嘅方法等等,重新體驗動畫版嘅故事,非常忠於原著。

 

 

喺正式講遊戲系統前,簡單講下畫面表現。遊戲整體美術風格採面用卡通渲染(Toon Rendering),人物貼圖、面相及表情都做得非常唔錯還原度高,各城市場景亦睇得出有落心機做(雖然遠景比較簡陋)。至於打擊感就表現得非常唔錯,斬擊有質感,施放技能特效華麗但唔會太誇張,奧義擊中時更會有 Cut-in 畫面,觀賞性滿分。

 

面相可以話係完美還原

場景有落心機做,就連側邊巷仔都有做埋出黎

 

戰鬥系統就要分為兩部份講,因為故事同對戰模式完全係兩種玩法。喺故事模式中玩家會遇到各種強大對手,例如「手鬼」係一隻數倍於炭治郎大小嘅鬼、「朱紗丸」(手球鬼)有大量範圍性攻擊等等。呢類強敵最麻煩嘅地方係會進入激昂狀態,即係俗稱「霸體」(即係所有轟飛、硬直無效),一味齋劈換血的話對玩家絕對不利。正確嘅打法係觀察對手嘅攻擊模式、距離、間隔,再喺空隙中偷位攻擊。當對手血量降至一定程度後會變身 / 強化,會改變既有攻擊模式,攻擊招式更多變化,到最後階段仲要玩埋 QTE,整個過程緊張刺激,非常好玩。

 

對方有「霸體」,換血對玩家不利。要細心觀察對手攻擊模式、距離、間隔,再喺空隙中偷位攻擊

打沼鬼就要望實地下,避開啲影

殺敵最精彩一刻會有多次 QTE 玩,出現位置適中令人更「入戲」

 

喺整個故事模式中,每章都會有強敵對決,而且佢哋嘅攻擊模式各有不同,亦感受到製作團隊用返該角色特點設計返相應嘅行動模式,可謂落足心機。另外,喺每關中間會有「探索」部份,玩家要喺各地區完成任務及尋找鬼滅點數等資源(用於解鎖物件、角色),地圖複雜度同大小適中,係比你過下癮但又唔會玩到燥果種,抵讚!

 

「探索」部份重現返炭治郎嗅覺靈敏特質,要「聞」出線索

 

對戰模式就同故事模式有頗大分別,相對地接近返一般格鬥遊戲,但係唔好以為好難入手,理解系統後,好快就會體驗到格鬥遊戲嘅快感。先講一講基本系統,攻擊主要分為輕、特殊、同抓技(俗稱投技)三種,遊戲預設只要按輕攻擊(□)四下就會達成普攻連擊,特殊攻擊(△鍵)就分為普通按△、推方向同時按 △ 以及 R1+△ 三種,抓技就係 R1+□。至於防守嘅手段除咗按 R1 擋格之外,按 ○ 加方向閃避都係一種手段,以上係遊戲基本操作。

 

 

理解基本之後,就要開始諗進階嘅玩法。歡樂向玩法自然係齋撳輕攻再或者狂放技能,但係當你嘅對手識用 R1 擋招你已經無符。要破防得三種方式,一係不停攻擊直到對方「爆 Guard」;一係用抓技;仲有一種係儲力攻擊(方向 +□ 長按)。問題係,三個方法都係唔係輕易做到,而家就話你聽點解。

方法一,除非你可以無間斷攻擊,否則你招式出現硬直一刻對方已經確反;方法二,正面接近用抓技風險極大;方法三,當儲氣時角色無辦法進行其他動作,好易令對手有機可乘,風險極大。

 

擋格時會有顏色顯示「擋格值」,持續擋格就會一直扣減,扣晒就會「爆 Guard」做成大破綻

 

就咁睇齋擋好似無敵,但如果你識玩呢款遊戲,其實齋擋先係不利一方。當你進行輕攻擊連擊時,可隨時加入 ○ 鍵「追蹤奔跑」(會發生一下攻擊判定),呢個動作喺連擊中使用會扣一格氣,但係可以重置所有攻擊動作,意味住有氣的話就可以輕攻擊 x 4 > 「衝刺」Loop,一直打到對方爆防,而連擊中嘅變化又未止於此。

 

 

喺輕攻擊連擊時,如果用方向+○ 鍵就會變為「墊步」,呢個動作同樣可重置所有攻擊動作,但因為無發生攻擊判定同衝刺距離短,所以喺「輕攻擊」連擊中快速變為「抓技」會打對手一個措手不及,並且於對手起身前有一段時間組織下一輪攻擊。同一原理,使用「墊步」重置動作時,預判對方使用輕攻擊破投,你可以先一步出輕攻擊或用閃避向畫面上下方移動,等對方打空再攻擊。

 

連擊中用「追蹤奔跑」或「墊步」都可以重置所有攻擊動作,最大化 Combo 或組織打投二擇、時間差等戰術都必定會用到

 

除咗上面嘅技巧,仲有再進階嘅技巧,例如輕攻擊時同時按方向 ↑ 、↓ 就會派生出不同段數攻擊,爆覺醒後輕攻擊連段會增加一段,以上方法都可擾亂敵人反擊時機。另外使用 ↑ 的話大部份角色都可以用跳躍取消最後一下,以空中攻擊打中對手會令佢處於浮空狀態,最正係當你停止連擊時對手係不會倒地(除非連招中有使用倒地屬性攻擊),亦即係攻方可 Reset 攻擊又或者改用抓技,增加攻擊手段變化。

 

特殊攻擊都有捉心理玩法,例如我妻善逸嘅「霹靂一閃‧極」,只要有氣的話就可以連續施放,齋出一下又或者連續出幾下「陰」人反擊係唔錯嘅戰術

 

攻方手段變化多,守方亦唔係只有齋擋。除咗上面講過嘅閃避,喺擋格時推方向鍵會有一個「推開」嘅動作,如果擋格中使用就會推開敵人製造距離,令大家保持返一個打立回嘅狀態。對自己技術有信心嘅更可以用方向鍵+R1「招架」(即係俗稱 Parry),成功的話對方會產生大硬直,不過失敗的話自己都會露出小空隙,要小心使用。

 

每位角色都有一招技能有無敵時間(例:陸之型 扭動旋渦),必要時可爆技解圍。需注意技能打空的話會露出大空隙。

 

除咗以上攻守心理戰,當「共鬥糟」有氣時,玩家隨時可按 L1 叫出待機嘅隊友使出「共鬥技」,利用時間差為自己打開缺口亦係一種玩法,又或者長按 L1 切換使用角色,瞬間改變角色特性打對方一個措手不及都係唔錯嘅選擇。

 

萬一被連擊 Combo,只要援助糟滿就可以按 L1 用緊急脫離,強制打斷對方連招

 

總結

《鬼滅之刃 火之神血風譚》不論美術、打擊感、玩法都係水準以上,而且真正做到易入手同時有高階玩法,想輕鬆 Hea 打定係認真對決都得,加上喺《無限列車篇》電視版同新一季動畫《遊郭篇》之前推出,時間可以話係靚絕,買返隻自用定宴客都係上佳之選!

《鬼滅之刃 火之神血風譚》已於 10 月 14 日正式推出,對應平台為 PS5、PS4、Xbox Series X|S、Xbox One 及 PC。

最後送上限定版《鬼滅之刃火之神血風譚》圖片一張,入面嘅「多功能支架」做工精美,質數直達小土人級數,抵玩!

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章