【遊戲介紹】免費遊玩無限塔防 《Infinitode 2》巨大升級技能樹肝度十足

今年年頭推出嘅塔防遊戲《Infinitode 2》喺早排宣佈轉為永久免費,雖然畫面美術風格簡單,但係升級技能樹龐大,啱晒鍾意試唔同組合嘅玩家。遊戲變為免費,但內容就絕對唔少,用黎消磨時間簡直一流!

 

 

《Infinitode 2》由 Prineside 開發,係一款塔防遊戲。遊戲美術以非常簡約嘅方式呈現,所有敵人同炮塔都係以方形、圓形、三角形等簡單圖形表示,而玩法則同一般塔防相同,都係喺敵人經過嘅路上設置炮台,喺佢地進入最後地區前擊退。

 

 

遊戲最大嘅特色在於豐富嘅升級樹系統(超過300個不同研究),每次遊玩都會賺到資金,之後就可以點研究路線技能樹,而且仲要配合每種塔嘅特性同自己風格,因為每種塔特性同配置地段影響非常巨大。例如加強狙擊塔嘅射速同距離,咁就要盡量將塔放喺可以充份利用射程嘅地方先會發揮到最大價值。又因為遊戲主要係靠遊玩賺錢升級 Loop,基本上玩得越多就越勁,強調肝度多於一切。

 

 

因為以肝度為主,遊戲支援 Cross Save,玩家可以將已儲存嘅遊戲進度與其他設備同步,適合隨時隨地肝。當然,唔想太肝的話亦可以選擇課金,玩家可以透過一次性購買「雙倍收益」得到更多資源。

《Infinitode 2》已經推出,對應平台為 PC Steam、Android 及 iOS,對應繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章