【遊戲新聞】恐怖海底探險新作 《Hidden Deep》四人合作隊友隨時背後陰你

我哋年頭介紹過嘅多人合作遊戲《Hidden Deep》(幽閉深淵),以深入海底洞穴探險為題材,向未知地區探險,最正係唔知幾時隊友會中招隨時反咬你一口。想試嘅朋友要留意啦,因為而家招募緊玩家做測試,先睹為快。

 

 

《Hidden Deep》由 Cogwheel Software 開發,係一款驚慄橫向動作遊戲,最大支援四人連線合作遊玩。遊戲故事發生喺海底 1.6 公里嘅神秘洞穴,第一隊研究人員去調查時發現未知生物同異常現象,但之後研究人員突然失去聯絡。為咗搜尋佢地,玩家組成第二隊研究隊,由你帶領隊員前往救援並查明到底地方發生咩事。

 

 

遊戲特色在於玩家只係一個普通嘅研究人員,無特別能力亦無超強體術,有嘅只係各種現實存在嘅設備,即係抓鉤、掃描器、無人機等等。由於我地所前往嘅地方係完全未知嘅領域,所以我地要先利用掃描器進行地型勘探,甚只可以利用大型機械進行地形改造,當然仲有未知嘅生物同各種機關陷阱等緊你。

 

 

遊戲最大提供四人合作遊玩,玩家亦可選擇單人遊玩,大約有二十小時劇情內容遊玩。單人模式下玩家要對隊友下達命令又或者操作該角色進行任務。有趣嘅係當你以為身邊有隊友相對地安全,喺呢隻遊戲就可能啱啱相反。根據之前嘅資訊,神秘生物會寄生於人體上,輕則手臂被寄生,重則整個身體被佔據,變成人類外貌嘅怪物,伺機「陰」你一鑊。呢種玩法會令你操作隊中一人時諗其他三人做緊乜,係咪已經被寄生,透過未知嘅恐懼增加緊張恐怖嘅體驗。

 

 

《Hidden Deep》將提供超過 50 個關卡主線劇情、故事及生存兩種遊戲模式,預計於 2022 年初發售,對應平台為 PC Steam,支援繁體中文。現時已開放 Beta 測試,有興趣嘅玩家可到 Steam 頁面要求存取權搶先試玩。

五木

動漫電玩宅,極愛金田一系列,擅長動作及策略遊戲

追蹤

更多文章