【遊戲介紹】薩爾達溝汪達巨像 《Praey for the Gods》開放世界生存冒險打巨大頭目

《薩爾達傳說曠野之息》自由嘅玩法加上生存要素令大家玩得好歡樂,《汪達與巨像》可以爬上超巨大敵人身上戰鬥以小博大同樣令人興奮。《Praey for the Gods》就係一款融合以上兩隻遊戲要素並得到「極度好評」評價嘅作品,日前終於結束長達三年嘅搶先體驗階段,正式推出 1.0 版本,未接觸過嘅朋友係時候試下了。

 

 

《Praey for the Gods》(之前叫《Prey for the Gods》)由美國三人團隊 No Matter Studios 開發,係一款生存動作冒險遊戲,採用第三身視點,開放世界。故事講述玩家所扮演嘅主角被派往垂死冰凍世界邊緣,探索無盡冬天背後秘密。喺呢個冰天雪地嘅地方,身上只有單薄嘅衣服,喺面對巨大頭目前要先應付惡劣天氣,要盡力喺險境生存落黎。

 

 

遊戲有大量生存要素,冰天雪地下自然要生火取暖,要搵食物,仲要尋找禦寒裝備,因為寒冷會做傷害,亦要顧及疲勞度,適當時要睡眠。搞掂生存所需後,可以收集材料製作武器,並深入洞穴擊敗敵人以獲得更好裝備,順便可以解開埋藏於各地嘅謎題。喺 1.0 版本新增簡易模式,可以無視所有生存要素,武器耐久度亦都唔會扣減,適合新手遊玩。

 

 

戰鬥部份本作以物件破壞、攀爬巨大怪物為核心玩法,即係爬去佢地背脊,再起勢咁插(可惜頭目數量並唔夠多),地面戰則同普通動作遊戲差唔多,都係攻擊及翻滾為主軸。另外遊戲中接近所有地方都可以攀爬,去到高點再用滑翔傘喺高空探索;又或者喺冰冷嘅水中游泳尋找寶物。

 

 

《Praey for the Gods》已於 12 月 15 日推出,對應平台為 PS5、PS4、Xbox One 及 PC Steam,對應繁體中文。另外開發團隊表示,未來仍會持續為遊戲更新,加入更多故事、武器及關卡謎題等等。

五木

動漫電玩宅,極愛金田一系列,擅長動作及策略遊戲

追蹤

更多文章