【遊戲新聞】真新世代恐怖遊戲 《ILL》以新引擎 UE5 製作畫面更逼真

家用主機進入新世代,遊戲開發引擎亦都有新一代 Unreal Engine 5。啱啱公佈時播放嘅實機展示片段質素甚高,早前更有可供遊玩嘅《The Matrix Awakens》體驗版下載,雖然自由探索部份背景粗糙,但係主要部份表現出色,令人期待以新引擎製作嘅成品遊戲。日前以 UE5 引擎製作嘅恐怖遊戲 《ILL》就公開全新預告片,畫面表現的確無令人失望。

 

 

《ILL》由 Team Clout 開發,係一款恐怖動作遊戲,採用第一身視點。遊戲最早於上年年頭公開,故事未明,但係根據之前嘅影片,主要敵人係一種寄生蟲,侵入人體後仍保留一定意識,所以會出現執架生、拎收音機掉人呢類動作,而主角除咗用槍射擊之外,亦有「用腳推開」敵人動作。

 

今次發表嘅影片只有約 45 秒,當中並無敵人出現,主要係展示環境細節、光影處理等等,感覺比之前嘅展示影片更順暢真實,光線自然。而喺今次影片入面仲有一個彩蛋,為主角配音嘅正正係《Biohazard RE:2》、Netflix 動畫《生化危機:無盡黑暗》入面 Leon 嘅英文配音 Nick Apostolides,成件事即刻多咗陣「Bio 味」。

 

《ILL》現時尚處於開發階段,未有正式上市日期及對應平台,如果對本作有興趣嘅朋友可以 Follow 佢地嘅 Twitter 了解最新消息。

五木

動漫電玩宅,極愛金田一系列,擅長動作及策略遊戲

追蹤

更多文章