等待多時嘅《Rainbow Six》新作《Rainbow Six Extraction》（虹彩六號：撤離禁區）備受玩家期待，除咗上集《Rainbow Six Siege》（下稱《R6S》）品質優秀呢個原因，今集由以往 PvP 打法轉為 PvE 合作打怪都係一大原因。早前我哋有幸得到 Ubisoft 邀請進行媒體優先試玩，整體感覺幾唔錯，值得一試。

《Rainbow Six Extraction》由 Ubisoft Montreal 工作室開發，係一款射擊遊戲，採用第一身視點，支援最多三人線上合作同遊。今集故事描術世界被一種神秘外星生物「蔓生體」入侵，佢嘅特性係可以依附於無機體上不斷增殖，並改變有機生命體形態。面對呢個威脅，各國以大家熟悉嘅「Rainbow Six」小隊幹員組成「REACT」應變小組，去研究及對抗蔓生體，亦即係大家喺本作所進行嘅任務。

玩家可於總數 18 位特勤幹員中揀三位組成小隊進行任務，由於今次係所有成員共同對抗外星生物，所以再無分為攻方、守方幹員，全部都可以選擇，而佢哋嘅招牌技能亦都因應變為打怪有若干變動。例如 DOC 獨特技能「激素手槍」就追加補血功能（技能升到最高後可補 30HP）；FINKA 技能「腎上腺素激發」同原版大致相同，都係團隊時間內加血加速度，同時追加倒地自救功能，最正係無限使用次數，CD 完就可立即使用，推圖極好用。喺測試版本中，Rook 呢種一次性 Buff 類幹員最為弱勢，因為「防護包」加防技能只能使用一次，亦無法疊加，就算中途補充技能都得物無所用。

遊戲加入輕度 Rogue 元素，每次遊玩都會由系統指定三個不同類型任務，當中包括破壞巢穴、活捉樣本、獵殺菁英目標、採集活體組織切片、尋找失蹤幹員等等，有總數十二種模式隨機出現，難度就以關卡順序遞增。玩家每完成一個任務後就會進入氣閘，呢個時候可選擇繼續推進或這撤離，繼續推有機會得到更多獎勵，但係死咗的話就會得返極少經驗，撤離就即係立即結算。任務目標完成得越多，得到獎勵及經驗值就越高，所以每次完任都要根據手上嘅資源決定 GO 唔 GO。

基本玩法唔講太多，實際遊玩過程先係重點。由於怪物數量頗多，清除特定目標（例如拆巢穴）更會有暴走潮，補血手段稀少，難度頗高。又因為地上被「蔓生體」入侵，如果唔開槍打地下的話移動速度會變得極慢，導致子彈極缺，就算用手槍迎敵「慳住玩」都唔夠子彈用，亦因為感所以緊張感幾高，就算慢慢推都好刺激。

部份任務明顯係以《R6S》玩法更改，例如「破壞」任務係要求玩家喺地圖中尋找目標安裝炸藥破壞，玩家要喺一定時間內保護炸藥。本作同《R6S》一樣，可以破壞一般牆壁（講緊係怪物都識破牆），所以守點時會非常麻煩，好在喺呢隻遊戲入面玩家都有得「拉閘」，集中加固幾面牆，呢點就非常有上集嘅味道。

喺今次試玩中，最難玩嘅模式以「活捉樣本」最為麻煩，要先喺地圖上搵出目標外星生物（通常都係菁英怪），再引佢去到撤離點附近，然後再由另一位隊員潛行從後擊倒，被發現的話基本上都會失敗，當然殺死佢都係當失敗，而整個過程仲會有其他怪物出現，難到爆。

《Rainbow Six Extraction》有個幾唔錯嘅設定，任務失敗的話，玩家使用嘅幹員會判定為「失蹤」，喺之後嘅任務就無得再用果位幹員，要解鎖該為幹員就要等到有「失蹤幹員」任務出現。喺呢個任務玩家要尋找並解救被嵌入古菌叢嘅受困幹員，玩法係一個人負責拉佢出黎，呢個時侯綁住幹員嘅囊會發出光點，另外兩人就要一邊射擊光點一邊護衛，當成功解救後仲要帶佢返去撤離點，夠晒挑戰性。

總結：

《Rainbow Six Extraction》變為 PvE 玩法，但係難度絕對唔低，子彈少、回血手段少，但係敵人多到爆。好在每次尋找階段都可以用搖控車仔探路，時間又夠多，慢慢推都還好。另外每位幹員要升 LV 解鎖技能，又要解鎖槍械，耐玩性甚高，唯一可惜係只能三人同遊，如果可以跟返五人一隊相信會更好玩。

《Rainbow Six Extraction》將於 1 月 20 日上市，對應平台為 Xbox Series X|S、Xbox One、PS5、PS4、PC Ubisoft Store & Epic Games Store，並於首日登上 Xbox Game Pass，支援繁體中文。