【遊戲介紹】開放世界組隊打獵 《Way of the Hunter》強調極度擬真還原狩獵體驗

可以喺線上組隊合作嘅開放世界遊戲多數都係打怪或者打人類敵人,如果回歸原始玩打獵又有無興趣呢?新作《Way of the Hunter》強調極度擬真嘅狩獵體驗,仲要以現實歐美地區為背景,又可以同朋友組隊入森林尋找獵物,感覺新鮮。

 

 

《Way of the Hunter》由 Nine Rocks Games 開發,係一款擬真射擊冒險遊戲,採用開放世界,第一身視點,支援多人連線合作。玩家將飾演一名獵人,喺北美及歐洲地區中獨自或與好友體驗逼真兼自由嘅狩獵生活,或者遊玩故事模式經營家族狩獵事業,解決各種衝突事件或與其他獵人展開合作關係。

 

 

講到明係擬真打獵遊戲,咁就梗係主要係玩狩獵,為咗令大家有更逼真嘅體驗,遊戲中會出現多種野生動物,每種動物都會有自己嘅行為模式,例如動物見到人類存在時嘅真實反應。用槍械射擊亦有彈道物理模擬,要計埋彈道距離及下墜等因素,亦有重播子彈射擊擊回顧畫面,分析並改進自己嘅射擊技巧。射中獵物後,會留下血跡,玩家可跟隨足跡及根據動物行動模式追尋獵物,擊殺後亦會因應獵物身體及年齡等多種因素產生而有所不同,就算係同一款動物都可以狩獵多次。整個過程令你有專業獵人嘅體驗。

 

 

狩獵過程擬真,打獵地區同樣無 Hea。遊戲提供兩個面積 55 平方英里大型授獵場,要喺呢個咁大型嘅野外地區尋找獵物並唔係一件容易嘅事,特別係當你進入森林後會有黑熊、狼群等兇猛野獸,話唔定你先係獵物。

 

 

《Way of the Hunter》正式發售日期未有公佈,但係就話會於近日上市,有興趣嘅朋友可以先將遊戲加入 Wishlist,對應平台為 Xbox Series X|S、PS5、PC Steam、Epic Games Store 及 GOG.com,支援繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章