《虹彩六號：撤離禁區》玩家普遍好評，而且官方不停推出新活動維持新鮮感，喺 PvE 射擊遊戲黎講算係做得唔錯。早前 VJGamer 有幸參與即將推出嘅危機事件「夢魘迷霧」試玩活動，新玩法要玩家與時間競賽，無得好似之前咁慢慢清場，極有挑戰性。

危機事件「夢魘迷霧」係以舊玩法做基礎，再加入幾種新元素所構成，必需要有三人先玩到。基本結構都係分三關，喺第一關會隨機出現任務「樣本」、「孵化囊追蹤」、「三角測量」、「獵殺」、「抑制」，第二及第三關則固定為「淨化」及「消滅毒性古菌叢」。「淨化」同固有玩法類似，要清除一定數量嘅指定異常孵化囊（用 Pluse 會標示為黃色），清除所有孵化囊後，再喺惡性腫囊中取得樣本，成功後會削弱第三階段「毒性古菌叢」血量。

第三關「消滅毒性古菌叢」類似拯救幹員玩法，都係要先搵到「毒性古菌叢」，然後持續擊毀會輸血嘅古菌胞囊，最後會露出毒性古菌叢核心，摧毀後將完成任務。雖然幾個任務都係以舊有玩法改良，但係喺「夢魘迷霧」入面玩家會 Keep 住累積「神經毒素」（大約 1秒 + 1%），當毒素去到 30%、65% 及 100% 會出現各種負面效果（只有自己先見到），要搵到「神經刺激素補給箱」毒素先會降低 1 個等級，但基本上係唔容許你慢慢搵的，因為累積速度實在太快。

「神經毒素」所引致嘅負面效果係極之麻煩，達到 30% 後會出現幻覺敵人，除咗現身果下有紫霧之外，喺幻覺消失前基本上係同真實敵人無分別，而且出現頻率會隨累積嘅毒素增加，後期根本唔會有時間分真定假，有時係出一隻假嘅爆炸仔喺你前面，同時後面有隻真嘅爆炸仔接近你，然後就極容易誤射真嘢導致自己炸傷。毒素去到 65% 後視覺會扭曲兼模糊，當去到 100% 後會進一步縮小視野以及持續扣減生命值，大約係 5 秒扣 3 血，值到得返 1 血為止。因為累積速度極快關係，要去到 100% 真係唔難，所以唔可能慢慢推進，完全係與時間競賽。

真實敵人同幻覺敵人會同時出現，煩到嘔

「神經毒素」100% 後會持續扣血，拖得越耐越不利

我哋喺試玩時死咗幾次之後終於成功完成晒三嗰任務，發現隊伍入面最好有一個人帶車仔，其他人用被動回血增加容錯率。因為喺安全室、撤離區、氣閘艙係唔會累積毒素，可以用車仔先搜尋目標再計畫定路線，盡量減少喺迷霧中嘅時間。另外，REACT 科技係不受迷霧影響，所以 Pluse 都好推薦使用。

打得咁辛苦，獎勵自然都唔錯。參與「夢魘迷霧」危機事件嘅玩家可以解鎖新 REACT 科技：「激增手槍」，使用後可以令玩家速度加快並進入持續 15 秒嘅無敵狀態，仲大量新嘅外觀物品同飾品等你解任拎。除咗上述獎勵，只要玩家使用滿 10 級嘅幹員就可以賺取額外經驗值提升新功能「榮譽等級」，用途主要係解鎖永久 Icon、頭部裝備同制服。

危機事件「夢魘迷霧」今日正式上線，所有《虹彩六號：撤離禁區》皆可免費遊玩。遊戲對應平台為 Xbox Series X|S、Xbox One、PS5、PS4 及 PC。