雖然各大遊戲平台都有自己嘅 Online Store，但係有為數不少嘅玩家經常煩惱新 Game 買實體定數位版好，而呢個情況相信好快會被打破，因為日前微軟申請咗一個新嘅專利，允許擁有 Xbox 遊戲光碟嘅玩家到 Microsoft Store 下載該遊戲嘅數位版，亦即係唔需要再考慮買實題定數位版了！

根據外媒 Gamerant 報導，微軟新專利可使用本機或外部嘅碟機認證遊戲所有權，然後就可以喺 Store 下載返相應遊戲嘅數位版，如果使用嘅 Xbox Series S 就可以使用舊嘅 Xbox One 認證。簡單講就係將你實體版嘅遊戲變成數位版。喺呢個專利下 Xbox 將會更為強勢，因為現時 Xbox Series X|S 只向下兼容部份遊戲，但係用呢個方法後，所有非 Kinect 嘅 Xbox One 遊戲都會全面支援，Store 上面仲有販售嘅 360 遊戲亦都會支援埋，只要你有實體遊戲碟就得。

專利生效後，相信最大影響嘅反而係廠商，特別係最愛賣舊 Game 情懷嘅「大廠」。因為佢哋追鍾意就係久唔久出舊作合集，趁機再賣多次賺多筆。但係有呢個專利後，玩家只要用舊版光碟認證就可以喺新機上玩數位版，根本唔需要買多次「合集數位版」。另外有時部份遊戲會喺二手市場大跌價，玩家只要以平價入手呢啲實體遊戲就可以換成數位版，非常抵玩。不過暫時仲未知道認證呢個動作係咪要「每次認證」定係永久擁有，如果係後者就會非常方便。