神愛世人，只要你肯懺誨神就會寬恕你，呢樣野每次行過教會都會見到，但係你又有無諗過當神不再寬恕，而係對不信者復仇又會變成點？新作《I, the Inquisitor》就係玩呢個概念，對所有不信者進行血腥審判！

《I, the Inquisitor》由波蘭團隊 The Dust 開發，以該地作家 Jacek Piekara 流行奇幻小說《Inquisitor 》系列為基礎，係一款動作冒險推理遊戲，採用第三身視點。故事背景設定於與現實世界不同嘅 1500 年代，係呢個世界入面耶穌並無死喺十字架上，反而係擺脫十字架嘅束縛，並對不相信佢嘅人展開殘酷嘅報復。經過數個世紀後，大地仍然存在執行耶穌意志嘅審判者大軍，繼續以血腥洗禮所有不信者們，而玩家就係扮演佢哋當中一員。

身為審判者嘅玩家解決城中各種罪行、尋找、追蹤並審問嫌疑人，透過特殊能力及推理去拼湊證據並做出最終判斷，而你可以用自身嘅道德價值觀去決定嫌疑人嘅命運，你可以憐憫亦可以遵從神嘅旨意去肅清罪惡，每個分支都會引領玩家去唔同嘅結局。

查案時可使用特殊能力進入神秘嘅 Unworld，喺呢度可以更容易發現嫌疑人試圖隱藏喺靈魂中更深層次嘅秘密，但進入 Unworld 世界同時伴隨巨大風險，因為喺呢個世界有一股至高無上嘅黑暗力量，會竭盡全力摧毀任何踏入此領域嘅生物。

當然，有時並非查案就可以解決事件，暴力可能就係最佳嘅方法。遊戲同樣有戰鬥部份，不論喺現世定 Unworld 中，都可以持劍戰鬥，不過暫時未有詳細戰鬥系統資訊，例如會否有成長元素、等級、招式等等。

《I, the Inquisitor》暫時未有推出時間，對應平台為 Xbox Series X|S、PS5 及 PC Steam。