【遊戲新聞】Xbox 遊戲發佈會 多達三十多款作品一文睇晒

琴晚微軟遊戲發佈會「Xbox and Bethesda Games Showcase 2022」,一次過公佈黎緊有咩作品玩,而且有唔少都係首次發表。最正嘅係接近全部作品都係首日登錄 Xbox Gamepass,當中有大作有驚喜作品亦有日系遊戲,下面我地會為大家簡單介紹及列出所有作品影片,一文睇晒黎緊有咩玩!(按推出時間排列)

 

 

微軟自家招牌作品《Microsoft Flight Simulator》,為咗慶祝 40 周年,推出備受玩家歡迎嘅直升機、滑翔機、空中巴士 A310 等等,並且會同另一自家招牌作《最後一戰:無限》合作,加入飛行載具「鵜鶘號」(Pelican),以上所有內容擁有遊戲或者 Xbox Game Pass 會員皆可免費取得,並且即日起已可遊玩。

 

《上古卷軸Online》最新 DLC,將於 6 月 21 日推出。

 

《永劫無間》(NARAKA: BLADEPOINT),係一隻玩中式武俠風格嘅大逃殺遊戲,可以飛簷走壁。PC 版喺上年年尾進行公測,戰鬥系統、打擊感評價不俗,但係就有伺服不穩及延遲等問題,希望落 Xbox 之後會有所改善,6 月 23 日推出。

 

《As Dusk Falls》由獨立工作室 Interior/Night 開發(曾製作《Heavy Rain》、《Beyond:Two Souls 》),係一款互動式電視劇遊戲。玩家會去到亞利桑那州小鎮「Two Rock」,喺 1999 年搶劫失敗後,伴隨一連串犧牲、背叛等發展出黎長達三十年,有關兩個家庭間複雜嘅人際關係故事,並且會因為玩家嘅決定而改變故事走向。根據介紹故事分支極多,似乎比起《Detroit: Become Human》更複雜,7 月 19 日推出,有繁體中文。

 

開放世界競速賽車遊戲《Forza Horizon 5》同 Mattel 賽車玩具「Hot Wheels」合作嘅付費 DLC 內容。新增座落於墨西哥嘅「Hot Wheels」樂園,挑戰大量架設於高空嘅賽道以及各種特殊車輛,當中包括 10 台全新汽車,四台等比例放大 Hot Wheels 汽車,7 月 19 日推出。

 

《盜賊之海》(Sea of Thieves)第七賽季,更新後玩家可購買、自訂佈置船內裝潢、命名船隻、並可以儲存設定,7 月 21 日推出。

 

《異塵餘生 76》(Fallout 76)最新 DLC,將加入經典嘅三代地區「The Pitt」,9 月推出。

 

黑曜石娛樂(Obsidian Entertainment)開發,生存冒險動作遊戲《Grounded》脫離搶先體驗推出正式版。遊戲中玩家因為瘋狂科學家嘅實驗變到好細粒,庭院中嘅螞蟻、蜘蛛等昆蟲都變得巨大無比,透過撿拾樹葉、樹枝、垃圾等物資建設基地、武器求生,並設法將自己變會原狀。可四人線上協力遊玩,並於 9 月推出。

 

《High on Life》由《Rick and Morty》製作團隊開發嘅新作,係一款第一身射擊遊戲。遊戲以搞笑幽默風格為住,有各種搞鬼槍械及道具,主角由 Morty 演員配音,並且會有唔少向《Rick and Morty》致敬位, 10 月推出。

 

《槍火重生》(Gunfire Reborn),係一款結合第一身射擊、角色扮演、Roguelite 元素嘅作品,可以四人連機合作,非常歡樂,Steam 上亦得到「極度好評」評價,10 月推出。(詳細介紹

 

暴雪知名射擊對戰遊戲《Overwatch》續集,最大改變係由上集嘅 6vs6 變為 5vs5,並取消「Control」及「Assalut」模式,取而代之加入全新嘅玩法。兩隊要喺對稱嘅地圖中,爭奪中央機械人控制權,並推向對方基地。另外今集亦會增加大量 PVE 內容,可四人合作,可升級自己英雄,強化物品等等,10 月 4 日推出。

 

《Scorn》最初於 2014 年公佈,經歷 N 次延期後終於要推出了,係一款第一身視點恐怖歷險射擊遊戲。遊戲美術有極重《異型》味道,玩家要喺陰暗而錯綜複雜的地圖裡面掙扎求存。另外玩家手上嘅武器猶如擁有生命,可變成槍械、近戰武器,更能夠與場景其他物品互動,10 月 21 日推出。

 

Atlus 旗下知名日系 RPG 系列《女神異聞錄》(Persona),將會加入 Xbox Game Pass 陣容,包括《女神異聞錄 5 皇家版》(Persona 5 Royal)、《女神異聞錄 4 黃金版》(Persona 4 Golden)、《女神異聞錄 3 攜帶版》(Persona 3 Portable),不過三款中暫時只有 P5R 寫明於 10 月 21 日推出,其他兩款要等到 2023 年先會推出,幸好 Gameshow 前已表明所有遊戲都會係 12 個月內推出,幾乎可以肯定係明年春季推出,對應平台為 Xbox Series X|S、Xbox One 及 PC,有繁中。

另外,Atlus 將旗下皇牌作品放入 Xbox Gamepass,黎緊嘅新作《Soul Hacker 2》 又有 Xbox 版,相信會有更多合作,例如將《十三機兵防衛圈》放入 Gamepass。

 

黑曜石娛樂(Obsidian Entertainment)開發嘅新作《Pentiment》,採用中世紀插畫風格,係一款角色扮演遊戲。玩家將扮演一位畫家,意外地捲入一樁謀殺案,要靠自己嘅智慧尋找兇手。遊戲中所有選項都會影響劇情走向,由選擇生活模式、職業生涯到查案手法等等都會有所影響,呢啲影響更加會牽連幾代人,幾有趣,11 月推出。

 

《瘟疫傳說:安魂曲》(A Plague’s Tale: Requiem)老鼠第二集,今年最令人期待作品之一。今集繼續 Amicia 同 Hugo 嘅逃命之旅,舞台去到南方預言中嘅島嶼,同時仍被宗教裁判追殺中。最新影片中展示 Amicia 今集可於背後暗殺,對抗手段更多,2022 年內推出。

 

《Flintlock: The Siege of Dawn》由 A44 Games 開發,係一款動作角色扮演遊戲。玩家將手執戰斧、手槍配以魔法對抗不死軍團。影片所見動作流暢,打擊感不俗,值得留意,2023 年頭推出。

 

《臥龍:失落王朝》由 KOEI TECMO Games 旗下 Team Ninja 開發,係一款以三國為題材嘅動作遊戲,類近《仁王》。雖然未有機畫面,但係本作由《仁王》安田文彥與《血源詛咒》山際真晃共同製作,非常有信心保證,預計 2023 年頭推出。

 

擬真競速賽車遊戲《Forza Motorsport》,新一集大幅改良物理模擬精確度,不但車身更靚,就連賽道、雪糕筒等物件都用 3D 掃描,達致超高精細度。另外更會加入動態時間,更強嘅車身毀損系統,最正嘅係有即時光線追蹤效果,絕非只有 Replay 先有光追咁好笑,充份表現出新世代主機強大,2023 年春季推出。

 

《Lightyear Frontier》由 Frame Break 開發,係一款農場模擬冒險動作遊戲,採用開放世界,最大支援四人連線合作。主要玩法就係駕駛機甲進行農耕活動,閒時同隊友外出探索,2023 年春季推出。

 

《The Last Case of Benedict Fox》由 Plot Twist 開發,係一款類銀河戰士惡魔城動作冒險遊戲。玩家將扮演偵探 Benedict Fox,追查慘案嘅真相。遊戲獨特之處係主角可以憑依惡魔,以佢嘅力量窺探死人記憶,並能夠使用觸手戰鬥,2023 年春季推出。

 

獨立團隊 Team Cherry 開發嘅《空洞騎士》(Hollow Knight)新作《Hollow Knight: Silksong》。玩家將扮演獵人大黃蜂,前往新嘅絲綢大地挑戰全新敵人,係一款平面類銀河惡魔城動作冒險遊戲。雖然睇落去同上代分別唔大,但一貫優秀、高品質嘅內容仍然令人期待,2023 年推出。

 

《Ereban:Shadow Legacy》係一款主打快速節奏嘅潛行動作遊戲,主要玩法係潛藏於影子內於地面或牆壁中移動,趁機施以暗殺。玩家可配搭各種技能及武器豐富自己嘅戰鬥手段,2023 年推出。

 

Bethesda Games Studios 超級重頭大作《Starfield》,一直都被無得玩嘅人酸「無畫面得個吹字」、「肯定係伏啦」,結果琴晚就有長達 15 分鐘影片發佈,內含大量遊戲資訊及實機戰鬥畫面。玩家將扮演自己創造嘅角色,喺浩瀚星際超級自由地探索宇宙。

影片中展示玩家可建造自己嘅基地,確保生產及資源,亦可以自行製作、組合太空船,更可以駕駛往太空與其他船隻戰鬥。玩家亦可以喺星球上自由探索,對戰以射擊戰為主,感覺有啲似《Destiny》。戰鬥地區除咗地上更會有無重力狀態,影片中就有展示兩位男性激情互射。另外,可供任意探索嘅星球有多達 1000 顆,亦都表明生態各異,部份有極重 Cyberpunk 味部份極史前有恐龍,內容非常龐大。

《Starfield》將於 2023 年推出。

 

《暗黑破壞神 IV》(Diablo IV),展示「新」角死靈法師,同時釋出更多 Gameplay 畫面,暫時睇落唔錯,會有跨平台連線及同步進度功能,有 Xbox Series X|S、Xbox One、PS5、PS4、Nintendo Switch 及 PC 版本,暫未知會否首日 Gamepass,2023 年推出。

 

《Ravenlok》由多倫多獨立遊戲團隊 Cococucumber 開發,之前曾經製作《Echo Generation》,新作變為動作冒險遊戲。玩家將使用劍與盾,以斬擊、翻滾、法術戰鬥,探索奇幻童話世界,2023 年推出。

 

《Cocoon》由曾製作《Inside》、《Limbo》嘅設計師 Jeppe Carlsen 開發,同樣係解謎遊戲。今次玩跨世界冒險,每個世界都可以孭喺背脊。透過喺世界之間跳躍,玩家將可以組合、操作及重新排列,感覺非常玄,2023 年推出。

 

《Redfall》由 Arkane Studios 開發,曾製作《冤罪殺機》(Dishonored),係一款第一身射擊遊戲,採用開放世界,最多四人合作。玩家與其他倖存者組隊合作,獵殺吸血鬼大軍。有眾多英雄選擇,各自有獨特能力,例如影片中叫電話亭出黎幫隊友「Super Jump」、隱身、召喚槍械等能力,主打 PvE,2023 年推出。

 

《Ara History Untold》睇落非常有《文明帝國》味道,係一款歷史發展型回合制戰略遊戲。玩家將扮演一位領導人,去到未開發嘅土地建立自己國家及文化,當然仲要同其他國家進行外交或戰爭,隨玩家嘅選擇將會影響國家嘅發展,2023 年推出。

 

《Minecraft Legends》係《Minecraft》系列全新作品,類型係動作策略遊戲。會有大量玩家熟悉嘅《Minecraft》角色、元素,會有多人協力及對戰模式,2023 年推出。

 

擁有龐大玩家群《ARK: Survival Evolved》新作《ARK 2》,新片除咗話比大家聽係 Day 1 Gamepass 之外,就淨係得 Vin Diesel 出現,估計今集除咗恐龍之外,主題將會係「Family」,2023 年推出。

 

另外,Riot Games 亦都宣佈旗下多款遊戲登錄 Gamepass,不過都係 PC 同手機平台,主要內容係直接解鎖英雄、牌組、探員等等,暫未見有 Xbox 份。

 

其他相關文章:

【遊戲新聞】小島秀夫驚現微軟 全新作品開發中索粉怒罵背叛

【遊戲新聞】光榮全新三國暗黑動作遊戲《Wo Long: Fallen Dynasty》Xbox 獨佔推出首日落 Game Pass

【遊戲新聞】《底特律:變人》前資深員工領軍開發《As Dusk Falls》可多人互動劇情遊戲今年上市

【遊戲新聞】太空科幻版本的上古捲軸《Starfield》自由度耐玩度均為 100% 的野心作品
 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章