【遊戲介紹】恐怖驚慄模疑新作《The Mortuary Assistant》扮演殯儀學徒與屍共處長夜

模擬類遊戲唔少題材特別，玩法亦都好多變化，早前推出嘅洗地模擬器《PowerWash Simulator》（介紹文章）就令一眾玩家沉迷。早幾日就有款新嘅模擬類遊戲《The Mortuary Assistant》推出，短短幾日就得到「極度好評」評價，題材非常特別，就係要玩家扮演殯儀學徒與屍體共處一室，你又夠唔夠膽試下？

《The Mortuary Assistant》由 DarkStone Digital 開發，係一款恐怖驚慄模疑遊戲，採用第一身視點。玩家將扮演一位啱啱完成殯儀專業學位嘅畢業生，正準備到太平間實習，幫先人處理「身後事」。當你正準備著手進行防腐處理相關工作時，四周出現各種靈異事件，例如手上工作簿憑空出現神祕文字、空無一人嘅太平間彷彿有人喺度仲要疑似監視緊你，但你無法離開此地，到底你遊無辦法喺度捱過漫長嘅一夜迎接明天來臨？

遊戲中玩家不但要了解防腐過程，仲要正確地處理及照顧死者，同時又要練習神秘儀式識別惡魔實體，並拼湊線索驅逐惡魔拯救自己嘅靈魂，順便揭開隱藏於呢個太平間嘅秘密（即係叫你解謎）。另外，系統會有一定隨機性，每次遊玩都有野唔同，確保你唔會有「安全」嘅感覺，每一次都係獨特嘅體驗。至於故事方面，要透過驅逐每一隻惡魔，逐漸拼湊線索，要玩多周目先了解到故事全貌。