於 Gamescom 2022 中，NEOWIZ 已確認《Lies Of P》將於推出當日同時登錄於 Xbox Game Pass。

《Lies Of P》為一隻「類魂系」高難度動作遊戲，由 NEOWIZ 旗下工作室 Round8 Studio 針對次世代主機平台而開發，預計將對應 Xbox Series X｜S、PS5 及 Steam，預計 2023 年內推出。

《Lies Of P》劇本取材至意大利作家「卡洛·科洛迪」著名童話《木偶奇遇記》，故事時間點為 19 世界末被稱為「Belle Époque」嘅「美好時代」，舞台為法國。原本繁華而美麗嘅城市，因為出現疫病，一夕之間變成人間煉獄。

主角木偶「匹諾曹」於遊戲中化名為 P。製作出「P」嘅木偶師「爺爺」將 P 帶到車站後就失去蹤影，而覺醒嘅 P 則帶著「對抗疫病」嘅使命，以及「想要成為人類」嘅念頭，開始踏上旅途，並希望可以搵返「爺爺」。

遊戲可以話係暗黑版本嘅《木偶奇遇記》，P 係一個真人大小配有金屬手臂嘅高戰鬥力木偶，而奇怪疫症漫延嘅法國，無論係瀰漫住巴洛克風格嘅建築及街道、以及遊戲整體氛圍都帶有一點《Bloodborne》嘅味道。

近戰武器種類暫時見到有軍刀、刺劍、曲刀、斧頭、大型鋸刀，每把武器攻擊速度、範圍、攻擊動作、硬直等各有不同，例如刺劍輕武器攻擊速度快、重武器起手慢但崩值極高等等，而敵人亦明顯有對刺擊、斬擊、打擊等抗性數值，影片中所見有一位敵人明顯弱刺擊，用刺劍可打到防禦崩潰。

另外疑似有「戰技」存在，例如擋格後強反擊、儲力強力斬擊等等，亦有火槍一類遠距離武器使用。

玩家於《Lies Of P》裡面亦會遇上唔少殘存嘅人類，當中會產生唔同嘅支線以及選擇，可能需要玩家 P 選擇「講真話」定係「講大話」；唔同嘅選擇都會導向唔同嘅事件結果，亦會影響最終遊戲結局走向。

《Lies Of P》將對應 Xbox Series X｜S、PS5 及 Steam 平台，預計 2023 年推出，首發 Xbox Game Pass。