即時策略（RTS）類遊戲多數都係單機遊戲，但係黎緊即將推出嘅新作《The Valiant》就可以多人合作，同朋友一齊以小隊策略作戰感覺幾唔錯，而且背景係充滿魅力嘅歐洲中世紀，冷兵器互劈果種熱血，諗起都爽！

《The Valiant》由 Kite Games 開發，係一款即時策略角色扮演遊戲，最大支援三人線上合作。背景設定於十三世紀，以歐洲及中東作舞台。故事講述前十字軍騎士 Theoderich von Akenburg 因厭倦戰爭而離開戰場，直到當年嘅戰友 Ulrich von Grevel 發現古代神器「亞倫之杖」並企圖用佢為世界帶來災害，Theoderich 決定重返戰場與昔日戰友對抗。

戰鬥以即時戰略方式呈現，但就以小隊為單位，當中又分為一般單位及英雄單位，升級後更可學習各種主動被動技能，亦可裝備各種武器及盔甲，組成不同特性嘅英雄小隊。至於普通小隊亦會分為劍客（坦）、騎士（快速部隊）、弩手（遠程）等各類型，以及輔助類小隊，配合不同兵種去完成多達十五關戰役。

官方資料話會有戰役模式及競爭模式，戰役模式可單人遊玩或最多三位玩家合作，競爭模式即係 PvP，可以一對一或二對二，如果打排名賽的話更會有特別嘅獎勵，大家鬥砌隊鬥策略。因為有 PvP 成份，期望之後會有 DLC 增加更多兵種、英雄等等，去豐富對戰嘅玩法。

《The Valiant》預定於 10 月 20 日推出，對應平台為 Xbox Series X|S、Xbox One、PS5、PS4 及 PC Steam / GOG.com / Epic Games Store，支援繁體中文。