電競設備開始普及，大家平時都聽得多 144Hz Mon，但係實際用落同你屋企本身用緊果隻差別有幾大，好似又真係無乜地方試，如果想試拍埋 240Hz、360Hz 一齊做對比就更加無乜可能，極其量都係上網睇下人 Review 之類。

如果你想親身試下到底 144Hz、240Hz 同 360Hz 係咪真係啲人吹到咁勁，機會來了，因為今年喺灣仔電腦通訊展 BenQ 就有特設一個屏幕體驗區，俾你親自試下佢哋嘅分別！

黎到 BenQ 攤位，見到佢哋轉咗新 Design，擺脫過去果隻沉悶紫色，新 Theme 都幾有電競味。慣例左邊係有一板 Mon 做 Display，有投影機有燈咁，不過重點都係 144Hz、240Hz 同 360Hz 屏幕體驗區。

佢哋 Set 咗《APEX》及《CS:GO》比大家試（26/8（星期六）14:30～16:30 達哥仲會過黎試產品），現場有三台機並排，玩家可以盡情試晒三部高 Hz 機嘅分別，睇下自己係咪真係要用到咁高 Hz，呢個設計的確係站在用家角度，抵讚嘅！

除咗重點電競螢幕體驗區，同場其他產品都幾抵玩，投影機仲要平到唔洗一千有交易，點都好過你買大陸雜嘜牌。現時喺會場內購物滿 $1000，仲有 BenQ 東京遊戲展（TGS）的日版會場限定獨家禮品（價值 $299）送，抵啦！