【優先試玩】《SEGA 新創造球會 2025》無課仔中毒福音令人喜出望外值得投資

呢幾年好少玩育成類遊戲，仲要係體育類，但最近就試咗《SEGA 新創造球會 2025》。先講結論，期望唔高但愈玩愈中毒，有啲喜出望外，正式出本人會玩。隻Game封測時無得課金，暫時無課咁照玩得相當順利，由於平日裝App同Game太多，所以我係用後備手機玩，2021年嘅機都Run得好順，證明廠方優化得好。

利伸我係世嘉《創造球會》嘅長情Fans，由1996年《J LEAGUE 創造球會》開始玩起，早幾年都玩過隻手遊《ROAD to the WORLD》，不過《SEGA 新創造球會 2025》應該係源自《Football Manager》，因為 FM 間開發公司 Sports Interactive 2006 年賣咗畀 SEGA，所以真實球員育成似曾相識。

《SEGA 新創造球會 2025》嘅玩法，大概係咁嘅 — 你係一位足球監督，本身有主線劇情，隨著LV上升，會解鎖世界各地不同聯賽同新副本機制；你手上有一堆球員卡做「種」去組成夢幻隊伍，呢隊係用來打巡迴賽同之後玩家對戰，卡組可以抽，不過抽返來後只可以升基本能力，你都係要透過育成模式育成完、登記完，先會有成長版本嘅球員「入隊」，而每名球員都有原生技同繼承技、球隊風技等等，同一張卡幾多星、有咩技、點樣育成真係會差好遠。

「育成模式」即係你喺世界各地搵一個聯賽入面執教一隊波（根據主線劇情開放更多國家），每個賽季你都可以喺自己卡組選一至兩張卡入去育成（當然你要支付得起薪金），模式入面你可以不斷訓練唔同卡，一個賽季後，你就可以登記育成後嘅數值，拎去其他模式使用。

育成模式以一個賽季為一局，你可以玩完一個賽季又一個賽季，每個聯賽分 3 個 LV，每個 LV 嘅錢同對手能力都會多啲，不過你既「種」，玩「育成模式」係會有時間因素，球員會老，甚至會退役，有啲球員大器晚成，有啲就愈玩愈弱，簡單一句，你如果有 C 朗，不斷玩育成模式，登記到嘅 C 朗就會唔同，系統會自動更新一隻勁啲嘅。育成模式時有特別訓練，而特別訓練係要用訓練卡，訓練卡呢個就係遊戲嘅抽卡位/抽卡位，訓練卡都有得突破，相信我都唔使解釋太多。

隻 Game 最中毒嘅係，你可以執教任何一個聯賽，慢慢將自己手中「班底」融入去，再經營一個新班底，而且真係育成緊一盤生意，有錢就可以發掘球員，甚至挖角。最記得我玩咗 10 個賽季香港聯賽後，轉咗去韓國 K 聯賽執教，執教初期好多原班人馬爆退隊潮，當時我好缺一位中堅，於是每個月頭去意大利、德國同英格蘭搵，結果終於請到（對方實力太高就成功率低），請到有意傾，就要傾 Deal，Deal 好轉會費同年薪先算入到隊，入隊果日仲會開記招⋯⋯

比較喜出望外嘅係有香港聯賽，可以選大埔、將軍澳、南區等，亦可原創地區足球隊開局，我選了原創隊伍「沙田曼城」開局，一開始先將手中未育成嘅美斯安排入隊，然後選贊助商，便可開始遊戲，每個月以四格/四周嘅時間軸進行，每個月開頭你都可以人手選擇訓練項目，包括特別訓練球員，指導整體訓練方針抑或休息等等，過時間會有好多 event 發生，講真個育成幾有真實感，有啲球員一排無出場又話要同佢約談，我張意甲國米哥利亞就突然話自己有病，要我安排休息 5 個月，最後觸發「宛如不死鳥」劇情，學到招之後無咁易受傷嘅技能。

球隊錢從何來呢？呢個都係隻 Game 中毒嘅地方。你要起球場（我改名啟德主場館），擴建升級加設施等等，Fans 數目配合球場可入場上限，就係你每次主場嘅盈利能力，當自己搞緊「盛事經濟」。平日你都可以賣球員，或者從青年軍提拔，訓練好再釋出又得，好多細節迷過 FM 會知。

而個球場基本上跟住你轉球會，所以個球場相當重要，係一切挖角同組隊嘅資金來源，封測期間我只夠時間轉過一次去韓國教波，真係靠球場好快起家。有錢的話，成隊波去旅游集訓地點都可以豪華啲，呢隻 Game 育成模式入面，無錢真係萬萬不能。

一個賽季又一個賽季，隊波會顯示球員同球員之間嘅默契，整體都係真實向，如果隊中美斯係主力，平日球隊 event 美斯都會出來 9UP，Layout 無咗 SEGA 創造球會一直以來果種 Q 版公仔（狀態顯示仲用返），而且 Skip 系統幾好，早期我都仲要每星期入比賽畫面先按到 Skip，當你玩過一定賽季、監督有一定 LV 後，就會開放最簡單模式，「育成模式」自動每星期講結果你知，除非你想特別探究隊波有咩問題，如果唔係就玩純育成就OK，月頭安排訓練或休息，有特別事件做下決策，同埋不斷睇下有無啲外國球員有 5 成嘅成功率，有 5 成又啱用就可以出手。

我係好鍾意玩育成果種玩家，以前玩指令類嘅《足球小將：夢幻隊伍》玩過 6 年，好想足小有多啲育成元素，最後個球場都係換下皮換下 BGM 咁，有啲失望。近年紅過一排嘅《藍色監獄》，之前有隻得日版嘅《ブルーロック Project》，好有《賽馬娘》育成遊戲嘅影子，玩咗一年貨仔，後來頂唔順連健身室啞鈴都要課，於是就無玩了。《BFB》、《efootball》都有玩過一陣，感覺《SEGA 新創造球會 2025》個比賽畫面都好適合《efootball》玩家。

講真，呢個年代打機，我係主張課下金絕對無問題嘅，唔會話《G世代永恆》，48 蚊半月卡 3100 石都要上網出 post 話貴，關鍵係課幾多同埋可以玩幾耐，有無趣先。《SEGA 新創造球會 2025》暫時俾我嘅感覺係佢有好多位想你開局玩得爽，PVE 時間係可以好長，而且好多位可以睇廣告拎石同單抽，封測時基本上兩日就至少保證有一個 10 抽，加上仲有啲必中票，我封測咗 3、4日都中晒美斯、C朗，當然相信正式版玩到後期要打世界賽、巡迴賽、PVP，當然係要付出一啲，無課仔要玩落去，隻隻 Game 都係咁架啦；但我相信，如果正式版福利同封測一樣，真係無課仔中毒福音。