《Pokémon天梯入門》No.115袋獸

Pokemon GO 嘅出現又炒起咗一陣Pokemon嘅熱潮。作為一個長期嘅Pokemon非專業玩家,我高興但有少少失望,可能因為係市場策略,始終主打嘅市場唔同,始終同正傳手提遊戲機上有頗大嘅差距。借住呢陣熱潮,同時又接近賽季尾,我想向一啲有興趣玩返正傳嘅朋友,介紹返Pokemon嘅天梯賽嘅一啲入門攻略。

 

天梯賽,一般都會係選擇2v2嘅賽事。因為2v2嘅賽事可以組織聯防,唔會因為首發陣容造成賭運氣嘅局面,再者大賽都係2v2賽事為中心。如果由屬性聯防、先讀策略呢啲比較深入嘅嘢開始講,大家可能會一頭霧水。我哋不如由熱門寵開始講起。

 

No.115 袋獸,天梯賽嘅及格線。

袋獸 袋獸A 袋獸B

袋獸(新譯名都係用袋獸),普通系Pokemon,一隻由第六世代(XY版)一公布MEGA進化,就喺宣傳片出場,並穩企使用率第一嘅Pokemon。本身達到490能力值嘅袋獸,MEGA進化係最直接嘅 攻+30、速+10、其他+20;另外特性變成 親子愛(おやこあい Parental Bond):攻擊時,攻擊招式將使用兩次,第二次傷害為第一次嘅一半(範圍攻擊只會攻擊一次),招式嘅附加效果將發動兩次。MEGA特性相當於將所有傷害都1.5倍化,各能力值亦都直接強化。基於佢嘅直接強力同泛用性,好多玩家都會揀佢。所以要喺天梯爬ELO,就要先了解袋獸,無論你係用佢,定係對抗佢。

 

根據統計,

招式:

89.3%會用 下馬威(ねこだまし Fake Out):普通系物攻招式;40威力;100命中;先制+3,命中後,100%使對象擔怯。但只能於出場嘅第一次攻擊中使出。

80.2%嘅會用 突襲(ふいうち Sucker Punch):惡系嘅物攻招式;80威力;100命中;先制+1,但攻擊對象必需於較後時間攻擊,否則會失敗。

59%會用 增強拳(グロウパンチ Power-up punch):格鬥系物攻招式;40威力;100命中;命中後,攻擊力提升1級(*提升能力值級別,為2/2嘅基礎上,於分子上+1,最大提升6級)。

49% 會用 報恩(おんがえしReturn):普通系物攻招式;102威力;100命中;按親密度計算威力,最大102。

30.9%會用 捨身攻擊(すてみタックル Double-Edge):普通系嘅物攻招式;120威力;100命中;命中後,自身承受1/3嘅反彈傷害。

以上為最熱門嘅5招,其他嘅常見招式仲有火拳(ほのおのパンチ Fire punch)、冰拳(れいとうパンチ Ice punch)、下踢(けたぐり Low Kick)、保護(まもる Protect)以及欺空隊專用嘅臂錘 (アームハンマー Hammer Arm)等,都係一啲對應對伍組合而去揀嘅招式。

裝備:

99.6%為袋獸石。

特性:

70%為氣魄(きもったま Scrappy):普通系及格鬥系招式能命中幽靈系。

26.7%為早起(はやおき Early Bird):睡眠狀態嘅時間減半。

 

一堆數據丟出嚟,唔洗驚,我哋慢慢解(釋/拆)。首先,以天梯賽經驗嚟講,上述嘅數據非常準確。基本上出得場你見得到、用得到嘅都係MEGA袋獸。

 

下馬威(ねこだまし Fake Out):

由於2v2對於搶佔出招嘅先機係相當講究,所以見到大部份都會有一招 下馬威 旁身。先制+3,命中後膽怯,除咗部份速度快過90並有快速檔格(ファストガード Quick Guard)嘅Pokemon外,基本上等同於停咗一個敵人一個回合,甚至可以用嚟截擊慢過你嘅Pokemon嘅下馬威。MEGA前嘅特性氣魄,玩家可以唔MEGA住,用嚟截擊幽靈系。呢招用上去,唯一嘅心得就係,你覺得有威脅嘅Pokemon就截停佢啦,會提供一個回合,等隊友攻擊或起壇。

 

突襲(ふいうち Sucker Punch):

同上,同樣係搶先機嘅先制技,先制+1。(80+40)威力嘅先制技係相當有力,而且惡系招式可以剋制普、格打唔到嘅幽靈系,對於袋獸嘅打擊面嚟講係相當重要。用呢招有兩點要留意,一、係先讀對手會出攻擊招式,否則會攻擊失敗;二、係如果對手本身快過你,同樣出先制技下,你會攻擊失敗。諗好呢兩點,基本上就無問題架啦。

 

報恩(おんがえしReturn)/捨身攻擊(すてみタックル Double-Edge):

本系招式,袋獸實際嘅攻擊手段。由於係普通系招式,所以威力會1.5倍,變成(報恩)153同(捨身攻擊)180。兩招只會學其中一招,威力相若,但2v2中差之毫厘,謬之千里。一般爆速嘅袋獸,會學捨身攻擊,因為如果差嗰27威力打唔死對手,自己所受嘅重創一定唔只呢1/3嘅反傷;而偏半坦嘅袋獸,就會學報恩,就係因為嗰1/3嘅反傷。

 

增強拳(グロウパンチ Power-up punch):

格鬥系招式,一招最為配合特性 親子愛嘅招式。攻擊後會發動效果兩次,所以會直接提升2級嘅物攻,即由2/2>4/2倍攻擊力,令到往後嘅攻擊都接近可以確一(確實地一擊擊倒)。同時間格鬥系可以為袋獸提供唔錯嘅打擊面,對岩石系、鋼鐵系、冰系、普通系、惡系都有2倍嘅傷害,而當中包含咗普通系招式半減嘅鋼鐵系同岩石系。

 

***臂錘 (アームハンマー Hammer Arm):

格鬥系物攻招式,100威力;90命中;命中後會下降1級速度(*下降能力值級別,為2/2嘅基礎上,於分母上+1,最大下降6級)。

 

欺詐空間(トリックルーム Trick Room):

後制-7;5回合內,行動次序倒轉為速度愈慢愈優先。

作為100速度種族值嘅袋獸本來係唔適合放喺欺空隊呢種愈慢愈先攻嘅隊伍裡面。但如果喺設置欺詐空間嘅回合使用,變相可以先利用100嘅速度種族值去快速攻擊一次,並且同時利用特性將自己嘅速度減半,進入欺詐空間之中。呢一種能夠同時活躍喺欺空前同欺空後嘅設置,其他嘅Pokemon好難會學得到。並且由於係格鬥系嘅原因,所以可以好似增強拳咁補充到足夠嘅打擊面。

 

上述嘅基本上係平時見到嘅袋獸配招。而呢啲配招,亦都係貫徹袋獸嘅特式,普通地強力。用起上嚟要考慮嘅嘢唔多,就只不過係要揀用邊招打邊個。對於新手嚟講,係最適合不過嘅攻擊手選擇。

 

點解我話「No.115 袋獸,天梯賽嘅及格線」?因為正如上面所講,袋獸就係普通地強力,實而不華,於天梯賽又常見,即使你唔係用佢,你都一定要組得出一隊打得贏佢嘅。以下落嚟就講下,面對佢有咩對策。

 

對策一,鐵釘鯊皮。針對袋獸嘅特性親子愛,利用近身攻擊就會對攻擊者造成傷害嘅Pokemon去接攻擊。特別係喺出場使用下馬威嗰下,因為下馬威係袋獸最低威力嘅攻擊,加上被下馬威擊中都無得還擊,就順水推舟換入嚟接住呢下馬威。特性鐵釘、鯊魚皮,每被攻擊一次都會削對方1/8最大生命值,加上安全帽再扣多1/8,即當接住一回合袋獸嘅攻擊,都會扣袋獸一半血。呢個技巧,要玩家先讀到對方嘅袋獸要下馬威邊一隻,雖然係要一啲技巧同經驗,但呢招對付袋獸,係一下就報廢。

 

對策二,高威力格鬥突破。如果你組嘅嗰一隊,有一隻MEGA嘅格鬥系,例如No.308恰雷姆(チャーレム Medicham)、No.448 路卡利歐(ルカリオ Lucario)、No.256 火焰雞(バシャーモ Blaziken)、No.428 長耳兔(ミミロップ Lopunny)。基本上你嗰隊就係可以完剋袋獸。只要佢哋用格鬥系招式轟落去,極限HP嘅袋獸都可以確一。另外,No.534修繕老人(ローブシン Conkeldurr)及其他坦攻型嘅格鬥系都可以利用高防高攻嘅特點,配合吸收拳(ドレインパンチ Drain Punch)一邊攻擊一邊回復返傷害。

 

對策三,削弱物理力。利用干擾坦型嘅幽靈系,屬性將袋獸嘅下馬威、報恩、強化拳、捨身攻擊會部無效化,再加上干擾坦輔助嘅特性,甚至因為唔會使用攻擊招式而將突襲都封印埋,將會變成袋獸無辦法攻擊嘅對象。再加干擾型嘅幽靈系可以使用鬼火(おにび Will-O-Wisp),可以令到袋獸陷入燃燒狀態。燃燒狀態會令物攻威力減半,變相陷入咗狀態後,袋獸就已經變成一隻無力嘅攻擊手。

 

對策四,特性交換。呢個係我個人嘅純經驗心得,網上一般都未必有咁嘅攻略對策。特性交換本來係用嚟畀對隊友而達到特性重新發動效果嘅。但因為袋獸係環繞住特性親子愛而設,只要交換咗特性,就會將袋獸嘅攻擊力減少1/3,並失去效果發動兩次嘅機能。而且交換特性後,可以令到我方嘅Pokemon使用呢個咁強力嘅特性。特性交換係一招同時削弱袋獸,又強化自己嘅對策。

 

好喇,睇完上面咁多有關天梯賽時,「點樣用袋獸」同埋「點對付袋獸」嘅攻略,應該可以初步理解到天梯賽嘅出場率第一嘅袋獸。不過,攻略還攻略,都係要落場親身面對幾次,先能夠精通用/對付袋獸。因為「Practice make perfect」,只有實戰經驗,先係致勝關鍵。有機會,我哋再探討其他Pokemon。

 

 

古渡

古渡 《Pokemon XY》400小時遊玩時間,天梯賽1700以上嘅非專業玩家。閒時會寫下嘢咁

追蹤

更多文章