《Pokemon天梯入門》1600對賽觀摩&主流戰術認識

對上兩篇都係齋對應單一Pokemon分析,好似有啲不足,同埋有啲悶。應總編要求,我都係搵返一場天

梯賽嘅實戰嚟講解下,順便介紹唔同嘅戰術。

 

 

片主陣容:

14331090_10154103982742968_2116624793_n

No.681_堅盾劍怪(ギルガルド Aegislash);鋼鐵/幽?系。

No.260_巨沼怪(ラグラージ Swampert);水/地系。

No.186_蚊香蛙皇(ニョロトノ Politoed);水系。

No.591_蘑菇桶(モロバレル Amoonguss);草/毒系。

No.373_暴飛龍(ボーマンダ Salamence);龍/飛行系。

No.645_土捲雲(ランドロス Landorus);地/飛行系。

 

片中係1600 elo嘅玩家,呢一隊係一隊雙MEGA嘅隊伍。即係一隊有兩個核心,分別係雨天下雙倍速嘅 MEGA巨沼怪,同埋,普通系招式變飛行系並1.3倍威力嘅 MEGA暴飛龍(暴蠑螈)。由於天氣隊喺合適天氣下,幾近無敵,基本上片主係以雨天隊為主。而 堅盾劍怪同 蘑菇桶就係兩隊都共用嘅鐵膽。而我今次特別揀選咗佢無用到雨天隊嘅一戰,一來因為無咁壓倒性,二來我都可以講解下點解PICK嘅時候要改用暴飛龍。

 

對方陣容:

14349207_10154103993007968_174549904_n

No.428_長耳兔(ミミロップ Lopunny);普通系(格鬥系)。

No.663_烈箭鶲(ファイアロー Talonflame);火/飛行系。

No.130_鯉魚龍(ギャラドス Gyarados);水/飛行系。

No.563_死神棺(デスカーン Cofagrigus);幽靈系。

No.468_波吉飛機(トゲキッス Togekiss);妖精/飛行系。

No.635_三頭龍(サザンドラ Hydreigon);龍/惡行系。

 

PICK嘅時候,由於巨沼怪主要嘅攻擊手段係地震,其次係攀瀑布。而觀乎對手有三隻飛行身、一隻飄浮,基本上 地震嘅作用就好細,而 鯉魚龍嘅特性 威嚇更加會減少 巨沼怪嘅攻擊力,所以出 巨沼怪將相當不利。同時間對方並無太多嘅飛行系抗性, 暴飛龍飛行系嘅 高音基本上係通行無阻。

 

14287522_10154103982977968_76634622_n

14302984_10154103983042968_924244653_n

 

雙方發出嘅首陣,可以話係標準中嘅標準。片主放出蘑菇桶去支援同掩護有範圍攻擊嘅暴飛龍,暴飛龍嘅特性威嚇亦降低咗長耳兔一級物攻;對方放出有下馬威嘅長耳兔同埋兼共掩護同屬性聯防嘅波吉飛機。呢個出場組合,對方無論邊一隻都有能力確一暴飛龍;同時間,暴飛龍可以確一長耳兔。

 

第一回合:

片主由於上面嘅總總不確定性,決定將主將 暴飛龍換出,換入 堅盾劍怪。換入相當明智,因為先讀到對方 長耳兔用 下馬威攻擊 暴飛龍,換入不但保住咗 暴飛龍,仲浪費咗 長耳兔一回合。波吉飛機以 空氣切割攻擊 蘑菇桶,既係剋制屬性,若擊殺失敗,亦能搏膽怯暫停 蘑菇桶一回合。而已 蘑菇桶不但無被確一同膽怯,更利用 孢子將最具威脅嘅 波吉飛機催眠。

 

如果要評價呢一個回合,只能夠話係片主先讀 下馬威嗰下完勝對手。但如果 下馬威打 蘑菇桶,或者用冰拳攻擊蘑菇桶,個結果已經好唔同。不過,始終 暴飛龍係有能力確一 長取兔,下馬威 暴飛龍係一個保險做法,被先讀就係「一子錯,滿盤皆落索」而已。

 

隨住 波吉飛機陷入睡眠,堅盾劍怪換入,勝利女神機本上已經向片主微笑。首先 長耳兔雖然特性 氣魄可以用格鬥招式攻擊 堅盾劍怪,但一來 堅盾劍怪未變身成劍型態偏硬,二來 蘑菇桶有 忿怒粉末可以將攻擊轉向佢,三來要提防 孢子連 長耳兔都催眼埋;所以 長耳兔被迫呢個回合只能對付 蘑菇桶。相反片主嘅 堅盾劍怪可以用鋼系招式攻擊妖精系嘅 波吉飛機,而且可以無視已縛手縛腳嘅 長耳兔。

 

第二回合:

片主保險而且非常安全地,以 蘑菇桶用 忿怒粉末掩護 堅盾劍鬼;同時間,如我上述,長耳兔明知會被強制攻擊 蘑菇桶,所以使出 冰之拳,由於 暴飛龍降低過佢一級物攻,長耳兔唔夠力將半血嘅 蘑菇桶擊殺,同時間被 蘑菇桶裝備嘅 安全帽扣減1/8最大HP。堅盾劍怪 使出 光柵炮 攻擊陷入睡眠嘅 波吉飛機,削減一半嘅HP。

 

第二個回合,其實係好標準嘅殘局部署,已經唔需要先讀。唯一比較亮眼嘅係 波吉飛機嘅努力值配置相當唔錯,竟然可以唔被 堅盾劍怪確一。而殘局係繼續落去。

 

第三回合:

延續上一個回合嘅打法,犧牲 蘑菇桶去換 最具威脅嘅 波吉飛機。長耳兔再無辜地白扣1/8最大HP。蘑菇桶、波吉飛機退場。雙方分別換入 土捲雲、鯉魚龍,出場各自因應特性 威嚇減低對方陣營嘅一級物攻。

 

在我來講,如果 長耳兔已經被人下降咗兩級物攻,我必然會換出;一來減半後嘅攻擊力已經嚴重不足,二來重新換入可以有多一次下馬威嘅機會。鯉魚龍持有嘅廣範打擊面加上裝備 專愛圍巾(速專),基本上可以用嚟攻擊片主手上任何一隻Pokemon,所以片主選擇咗⋯

 

第四回合:

片主換出 堅盾劍鬼,換入 暴飛龍,特性 威嚇再下降對方陣營物攻一級,長耳兔只淨2/5物攻,而鯉魚龍即時變成 2/4物攻。同樣裝備有 專愛圍巾嘅 土捲雲,使出 蜻蜓回轉攻擊 長耳兔,換出以回避 鯉魚龍攻擊嘅同時取消物攻下降嘅狀態;換入 堅盾劍怪以佢嘅盾型態同埋與 土捲雲弱點完全相反嚟作屬性聯防。即時相當飄亮地擋下 冰之牙同冰之拳。

 

呢一個回合,又係一次完全嘅先讀勝利。即使對方持有冰系招式,能夠同時打擊 土捲雲、暴飛龍;長耳兔及 鯉魚龍都有能力確一 劍型態堅盾劍怪。但因為 堅盾劍怪嘅弱點同另外兩隻Pokemon完全相反,所以根本唔會意識到要用冰系招式攻擊 堅盾劍怪,同時間 土捲雲嘅 蜻蜓回轉將一次必死嘅確一變成 堅盾劍怪嘅完全防禦,大局已定。不過,正如我上面所講,我始終認為要換出 長耳兔,換出可以重置物攻等級,亦能用多一次下馬威。可能對方顧技 岩崩會同時擊殺 鯉魚龍同 烈箭鶲。

 

第五回合:

捉棋來講,片主已經係贏多對方最少兩步,已經進入一個收割嘅階段。對方終於迫住換出 長耳兔,換入 烈箭鶲;而 速專鯉魚龍用 冰牙攻擊 暴飛龍,但因為已經減半咗物攻,無辦法做成太多傷害;雖然令到 暴飛龍膽怯至停一個回合,但無傷大雅。堅盾劍怪用 影子球攻擊 鯉魚龍,純粹因為片主認為 暴飛龍嘅高音係可以確一 烈箭鶲或 長耳兔,而且亦無招式可以用嚟有效攻擊 長耳兔。

 

第六回合:

片主考慮咗一陣,打算穩陣唔拚,以雙雙保護去任由回合過去,同時間可以評估對手嘅行動方針。對方兩者都集中攻擊 暴飛龍。

 

如果係我,我最多只能做到換出 鯉魚龍,換入 長耳兔。但其實風險好大,因為 暴飛龍範圍攻擊嘅 高音已足夠確一 長耳兔,所以對對方而言,其實已經接近死棋。

 

第七回合:

片主簡單地換出 堅盾劍怪,換入 土捲雲。基本上,再一次嘅 威嚇已經將 鯉魚龍廢咗,同時間換出 堅盾劍怪,直到 烈箭鶲陣亡先再換入,保證咗賽局嘅勝利。無力嘅 鯉魚龍除非暴擊,否則已經唔可能擊殺任何Pokemon。烈箭鶲嘅 火炎襲擊只係一次拚片主失誤嘅賭仔式刀仔割大樹,當然會被先讀。

 

第八回合:

烈箭鶲作出最後掙扎用 先制嘅戰鳥無懼攻擊暴飛龍,擊殺失敗;其實,就算擊殺成功,往後 土捲雲嘅 岩崩一次過擊殺兩隻後,半殘嘅 長耳兔都會陷入無範圍攻擊、同時被夾擊嘅場面。

 

第九回合:

片主又係安全起見嘅,換出換入同時用保護,消除 下馬威嘅威脅。

 

第十回合:

長耳兔終於擊殺 暴飛龍,但 堅盾劍怪嘅 光柵炮已足夠擊殺半殘嘅 長耳兔。

對賽結束。

 


睇完呢場,我哋首先嚟幫呢場嘅對手檢討一下先,往後我再延申到普遍戰術。

 

首先,非常之嚴重嘅問題,長耳兔喺被 威嚇減物攻後,本來就應該考慮換出。一來重置物攻等級,二來重新啟動下馬威。同時間,鯉魚龍亦遇上同一問題。

 

其次,過於公式化地認為第一回合嘅 長耳兔必然用下馬威。同時間無考慮到對片主最大威脅其實係 波吉飛機,即使下馬威,都應該優先以保護 波吉飛機為先,去攻擊 蘑菇桶。

 

以上兩點已經係致命點,其他嘅步伐已經係殘局中最好嘅棋。

 

從呢一場其實都尚算緊湊嘅對賽中,我哋會見到先讀與否係可以產生好大落差;如果我哋唔想被先讀,首先要避免公式化咁去用某幾隻Pokemon;例如 下馬威嘅使用者,有時可以考慮為一種威懾佯攻手段就夠。第二點,就係要組合好屬性聯防;片主一隻 堅盾劍怪就已經補足到主力嘅兩隻Pokemon,變相可以不斷透過交替而進行單擋;相反,對方由於主力同聯防都集中喺 波吉飛機身上,結果就形成「替唔替換好呢?」嘅兩難。

 


但先讀、屬性聯防,好多時都要清楚時下戰術或者起碼要知對方係咩隊先做到。咁我就喺以下嘅時間做一個簡單分類,方便大家去認識。

 

(一)天氣隊:

晴:No.006噴火龍Y(リザードンY  Charizard Y)、No.038 九尾(キュウコン Ninetales)
14329014_10154103983982968_1835467004_n 038

 

雨:No.186蚊香蛙皇(ニョロトノ Politoed)、No.260巨沼怪(ラグラージ Swampert)

14285713_10154103994132968_1931945373_o240

 

雪:No.460 暴雪王(ユキノオー Abomasnow)

14341903_10154103993352968_790004009_n

 

砂:No.248 班吉拉(バンギラス Tyranitar)、No.450 砂河馬(カバルドンHippowdon)

14315930_10154103993382968_1242884458_o450

天氣隊為一種極容易辨識,但又極度危險嘅隊伍。只要進入合適天氣,對賽嘅優勢將會壓倒性地傾向天氣隊。而其中暴雪王唯少數必需配合欺詐空間(トリックルーム Trick Room)使用。

 

面對天氣隊,要有截擊主攻手、天氣手嘅能力,並隨時切換己方攻擊主力。因為好似對付雨天隊,幾乎一定要有草系先可以;而對付晴天隊,就標準嘅 地震同 岩崩就夠;雪隊要截擊控場手;風砂隊就要改以物攻系招式攻擊岩系,因為風砂中岩系特防會3/2倍。

 

(二)順風隊:

No.169 叉字蝠(クロバット Crobat)、No.245 水君(スイクン Suicune)、No.468_波吉飛機(Togekiss)

14285176_10154103983797968_181674436_o suicune1 468

 

順風隊為配合招式 順風(おいかぜ Tailwind)嘅Pokemon嘅隊伍。設置一個兩倍化己方速度嘅環境四回合,等己方接落嚟可以全面速度壓制,同時間由於順風加嘅速好足夠,隊伍可以調整返啲努力值落生存力上,屬速攻隊嘅強化版本。另外、順風隊有優點,因為唔係天氣,所以可以配合其他天氣嚟用。如果話順風隊最怕見到咩情況,就係設置 順風該回合,遇上對方設置 欺詐空間,立即進入完全後制狀態。

 

(三)欺詐空間隊:

No.488克雷瑟利亞(クレセリア Cresselia)、No.080 大呆獸(ヤドラン Slowbro)、No.103椰樹獸(ナッシー Exeggutor)、No.460 暴雪王(ユキノオー Abomasnow)、No.323噴火駝(バクーダCamerupt)

14274543_10154103993277968_1078973540_o

 

欺空隊為配合招式 欺詐空間(トリックルーム Trick Room)而設嘅隊伍。設置一個以速度愈慢愈優先行動嘅空間五回合,等本身屬極慢速嘅Pokemon全面先攻壓制,而由於本身使用嘅Pokemon都低速並唔需要練速度,所以一般都生存力唔差。欺空隊有幾個可以針對到佢嘅位置;第一、欺空本身係後制-7嘅招式,所以任何可以令到佢停止行動嘅招式都比欺空手快,抱括催眠、膽怯、強制、挑釁換出技等,甚至可以直接集火殺死欺空手;第二、次回合如果對方場上有特性 惡作刻之心嘅Pokemon,好多時會補上 安歌(アンコール Encore)令到欺空手即時使用多次欺空,抵消原先設置嘅欺空,當然閑熟嘅玩家會喺呢個回合先讀換入主攻手;第三、欺空時間其實極短,設置嘅該回合會自動當一個回合,所以實際上只有四個回合,而同時間對方只要用雙重保護拖延,就好容易消耗晒欺空嘅回合數。

 

(四)單擋隊:

No.591 蘑菇桶(モロバレル Amoonguss)、No.036 皮可斯(ピクシー Clefable)

250px-591amoonguss  %e4%b8%8b%e8%bc%89

 

以一隻Pokemon吸引火力,另一隻Pokemon作主攻手嘅隊伍。好多時主攻手都會有最少一招範圍攻,以?補減少咗一隻攻擊嘅傷害。吸引火力嘅裝備上 安全帽,可以集火同時,扣減近身攻擊者嘅HP。單檔隊嘅優點係,無需特別設置控場,靈活性大;但缺點就係打少一個攻擊手,同埋面對範圍攻時,吸引火力嘅招式無用。

 

(五)滅亡之歌隊:

No.576歌德璃拿(ゴチルゼル Gothitelle)、No.094 耿鬼(ゲンガー Gengar)

14339810_10154103994027968_2137271592_o  094gengar_ag_anime

 

以滅亡之歌(ほろびのうた Perish Song)為主軸嘅隊伍。同上面幾種比,係異類,但必需要知。滅亡之歌使出後會進入滅亡之歌倒數,三回合後,即使不曾受傷都會陣亡,唯獨換出先可以解除狀態。點解要特別舉上面兩隻Pokemon,因為佢哋嘅特性 踏影,係令到幽靈系及持有 逃足以外嘅Pokemon都無法換出。所以佢哋只需要拖到第三回合換出,就可以確實殺死對手。面對佢哋有咩方法呢?幽靈系、特性 逃足、有換出效果嘅招式、強力確一上面嘅 踏影持有者、用挑釁防止使出滅亡之歌,除此之外,別無他法。呢種隊伍必需要防,因為佢哋都係天梯賽常客。

 

以上就係主流戰術會常見嘅隊伍組合。組隊嘅屬性聯防同應對,一定要考慮足夠,如果唔係爬天梯就會變成賭運氣。而遇見相關對伍可以嘗試先讀一下佢哋嘅行動。

 


今次先觀摩1600嘅對賽,再認識一啲主流戰術嘅隊伍。一次過肯定會有好多資訊要慢慢消化,先掌握咗概念,再慢慢落場實踐啦!

 

回帶相關文章:

《Pokémon天梯入門》No.115袋獸

《Pokémon天梯入門》烈日晴空-No.006噴火龍Y

 

 

古渡

《Pokemon XY》400小時遊玩時間,天梯賽1700以上嘅非專業玩家。閒時會寫下嘢咁

追蹤

更多文章