【遊戲包膠】《人中之龍6 生命詩篇》桐生大叔的最後一役之勇戰貓Cafe

《人中之龍6 生命詩篇》(龍が如く6 命の詩)推出左都一段時間,作為主角桐生一馬系列嘅最終章,相信 Fans 唔係唔玩呀嘛?我由第一代開始玩起就愛上左呢個遊戲系列,有人話佢係日本版嘅GTA,但我從來都唔認同架噃,GTA 入面邊有咁熱血正義嘅黑道大佬呀?同埋人中之龍仲有真島 x 桐生呢個鐵膽 CP……Sorry 我唔應該講呢啲。不過相比以往嘅人龍系列,今次呢一集喺遊戲細節同埋戰鬥系統上都作出左唔少改良,當然做新嘗試嘅話就有好有唔好啦……

 

機種方面,今次嘅人龍係 PS4 獨佔……咁當然啦,而家仲主力玩 PS3 嘅人應該真係唔多,不過今集官方無再好似《人中之龍 維新!》同《人中之龍0 誓言的場所》咁推出埋 PSV App。不過我個人又覺得個 App 無左其實無咩所謂,反正個 App 都係用黎賭吓錢咁,對推進劇情無明顯幫助嘅⋯⋯所以無左我又覺得無乜嘢。

 

故事方面,喺第五集成為偶像明星嘅阿遙,因為唔想自己成為桐生嘅負累,所以退出娛樂圈。雖然佢原意係以為咁樣可以保護桐生大叔,但係作為桐生唯一嘅弱點,幾乎集集唔係比人老笠就係綁架嘅阿遙,故事一開始就比人惡意用車撞到重傷入埋 ICU(咁多集佢啲戲份都好無陰公,不過其實今集如果唔係佢自把自為都唔會搞到咁大件事……),坐在幾年監嘅桐生亦因為咁樣,所以一放監就要再次拈手江湖事。

 

 

作為東城會四代目嘅桐生大叔,今次要面對嘅唔只係日本國內嘅黑社會,仲有黎自中國嘅黑幫;2016年嘅神室町面對嘅唔止係各黑幫嘅地盤侵略問題,仲好明顯咁暗示左而家日本一個社會現像,就係黎自中國嘅人口同埋資金投放嘅增加。除左當年發生嗰件事嘅亞細亞街居然成為左中國幫嘅地盤,變左超土豪味嘅中華街之外,喺地圖上面都不時會見到大陸字同埋舖頭。

 

 

亞細亞街變左啫,不過玩家唔會因此對個地圖感到陌生嘅!傳統地標例如:見證住桐生成個人生變化嘅「九州一番星」、24 小時雜貨「唐吉柯德」(入面個擺位同新宿店係一樣架!)、男公關俱樂部「Star Dust」、以及我每次去新宿都會去影張相留念嘅「歌舞伎町停車場」等等。

 

不過有一樣野真係要鬧……就係畫質。又話轉左新 Engine 嘅?啲人樣個個好似打左一噸 Botox 咁,膠到呢!仲有啲畫面同埋景物,近睇朦,遠睇都係朦(喂),即係如果你話個 Game 係第一次登陸 PS4 嘅,我都可以原諒你吖,而家我覺得係矯枉過正,之前個《人中之龍 極》甚至個 Demo 版都好似靚過製品版!(嗱,有朋友就話用 PS4 Pro 玩個畫質會正常返好多,我未買 Pro 無得驗證呀吓!)

 

 

今集《人龍》話哂係桐生 last call,啲角色當然係大卡士,阿銀小栗旬(誤)、北野武、L 藤原龍也(再誤)……不過呢啲消息出 Game 之前已經比大家炒熱哂,所以唔多講啦。不過可惜嘅係,雖然遊戲用左新嘅人物模組,令到角色活動上的確係靈活好多(例如撞到玻璃門會有反應、見到欄杆識跨過去咁);但係角色對話時嘅表情變化就非常生硬,係就係見到個樣嘅細節精緻左嘅,但係啲臉部表情太似機械人啦!就算今次 NPC 支援全語音都無分加呀!因為個膠樣,搞到我攻略啲陪酒小姐時真係勁無心機⋯⋯何況今集啲女已經唔高質,陰公。

 

 

膠樣整得硬啫,但遊戲入面啲食物都叫靚左嘅;今集改良左個進食模式,將體力同胃袋容量分開計算,所以想唔用腸胃藥又想全餐廳稱霸嘅話,唔需要好似舊幾代咁將自己扣到紅血先去暴食,因為你行行企企做支線都會幫助食物消化。桐生電話介面(去到2016年佢終於有 Smartphone 用啦陰公!)可以查看「成就目錄」,入面會有清晰列表話比你知你食左啲咩、未做啲咩,對於目標想要稱霸全目錄嘅人黎講,check 自己嘅進度的確相對方便左。

 

戰鬥系統我覺得好左啲啦,唔駛經歷過場動畫,見到敵人就可以衝埋去打,臨場感總算提昇左!同埋條街上面可以破壞或者用黎攻擊嘅道具都多左,進入戰鬥模式之後,如果拎部單車 K 人會整爆埋附近店舖嘅玻璃;旁觀路人會多左反應(驚或者食花生咁),呢啲細節嘅改動令到件事真實左唔少。至於難度方面,人中之龍入面難打嘅從來都只有「亞門一族」,至於其他敵人就只有厚唔厚血嘅分別,所以新手同舊玩家都唔會覺得有咩問題。

 

以前打交淨係可以喺大街上面進行,今集靈活度增加左,同雜魚互片嘅地域可以伸展到店舖入面!不過要注意嘅就係……假設你喺人地舖頭搞事,人地係會將你擺入黑名單,一段時間內唔比你幫襯!咁過癮嘅事大家記得有機會就試吓啦 ❤

 

 

小遊戲方面今集有啲驚喜!種類太多,變化少嘅(例如儲物櫃鎖匙、汽水機收集、麻將、棒球等等)就唔詳細講,以下四樣我覺得係比較有新鮮感嘅:

 

 

(1)機舖入面一向可以玩返 SEGA 舊遊戲,今集有啲新野,例如可以玩到完整版嘅《魔法氣泡》;如果好彩嘅(?)會喺機舖入面聽到佢播緊初音嘅歌添 LOL!

 

(2)桐生今集多左 Smartphone 之後,成就目錄會多左一項係叫你狂自拍,食野前佢會相機先食,自拍仲可以轉表情添,陰公,睇住四十幾歲堂島之龍好似發現新大陸咁日日老友Meme玩相機都咪話唔惡頂 w

 

 

(3)唱K方面,個樂譜版面略有改動,但難易度同以前差唔多,個 Feel 終於似返 2016年嘅 K 房,唔再係小酒吧或者 Disco Ball Bling Bling 廂房;MV 方面當然亦少不了惡搞桐生嘅機會啦(同埋啲歌詞譯左做中文真係中二到核爆)

 

 

(4)最後不可不提係本集重點:貓 Cafe!!!嗚呀!!!呢個新支線令我開心到一開 Game 就衝去便利店買貓罐罐(但係其實要衝左部份主線先可以開始搵貓…orz)呢條支線就係要你喺神室町搵野貓玩馴養 Play,然後老笠佢地返去 Cafe 度金屋藏貓。個人覺得呢個部份係成個遊戲最好玩嘅!!

 

 

 

總結:

個人喜好黎講,我就純粹因為自己係 Fans 所以想睇桐生點樣埋尾啦,如果唔係單以質素黎講,我都係比較想返轉頭玩返 FF15 美好嘅世界(喂)不過話哂係桐生一馬最終章……就算之前無玩過呢個系列,遊戲入面不時都會有回顧同埋講解,操作方面無論新手舊人都好易 Pick Up到,支線同埋各類型收集目錄依然係好玩過主線任務嘅!

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章