【遊戲包膠】戰場上的廢柴《蒼藍革命之女武神》

遊戲推出左大半個月,如果你本身係《戰場女武神》系列嘅 Fans、但係又好幸運地未入手呢個 Game 嘅,我強烈建議你:對自己好啲,唔好課金課時間,真係唔值得,成個 Game 嘅綜觀評價除左悶,就係爛!

故事大綱:
《蒼》嘅世界觀入面,地方嘅戰力同生產力都係黎自一種名叫「拉古耐特」嘅神秘藍色礦石;大陸上嘅國家為左爭奪更多「拉古耐特」而不斷發起戰爭。主角安姆雷斯身處嘅小國「日德蘭王國」長期比大國壓迫,所以遊戲一開始就宣佈開始抗戰。咁故事內容當然少不了一啲主角嘅個人私怨、我咁信任你你居然背叛我之類嘅狗血劇情啦(喂)話哂主角個外號係「五大罪人」,當初我都係比佢咁中二嘅稱號吸引左先決定買呢個遊戲架咋。

 

咁個遊戲嘅問題出左喺邊呢?以下我會逐樣講。

 

一、故事推進手法令人難以投入

 

又或者咁講,個劇本本身都無乜野(當然都唔算得上係相當有趣架喇……),但係個故事發展係用一種「回顧過去歷史」嘅方式,搵兩條唔關事嘅「歷史學家」出黎旁白,個感覺就好似你阿婆同你細個講「以前香港好窮呀~」咁嘅狀態去演釋!

 

打 RPG 嘅精粹就係:一直用同一個角色(OK,比到盡你五個角色好未?)去探索世界、推進劇本,咁樣玩家先會有代入感、同埋覺得自己喺同主角一齊升緊 Level 一齊成長!但係《蒼》嘅劇情推進極老套,打完一場仗,就彈你出返去「歷史學家」個畫面。呢個「歷史學家」嘅場景有咩用?你以為有選項影響劇情發展?錯!你只不過係可以重溫劇情片段或者動畫咋!大佬,打打下 RPG 你彈我出去一個唔關事嘅場景,淨係為左叫我催個阿婆繼續旁白個故事……咁嘅安排有咩謂?你係咪覺得個 Game 入面嘅場景同動畫好睇到要玩家一分鐘內睇兩次呀?平時啲 Game 頂多係喺主選單整個「Memories」之類嘅選項比玩家回味劇情,邊有人好似《蒼》咁,呢頭打完,嗰頭叫你「喂不如睇多次先繼續吖?」咁霸道架?

 

呢個設定絕對係大大大敗筆。我玩左兩個鐘直衝劇情,基本上都唔知自己玩緊啲乜。另一個問題係人物好多,但係每個角色嘅性格都唔係好鮮明!除左喺戰場上面可以 Switch 角色黎用之外,日常 Mode 入面主角同佢地勁少來往同溝通,就算有出現一啲對話場景,都係啲角色自己對話架咋,主角得個聽字,完全無得 Interact,我真係心諗做乜…鬼。

 

 

二、你逼我回顧場景動畫,但你個模組唔好再爛啲?

 

講多無謂,睇圖最實際(喂)《蒼》無論係人物/場景模組或者喺動畫質素,都好叻豬咁延續左 PSP 年代嘅水準!我無打錯你無睇錯,係 P・S・P!我玩左唔夠兩分鐘已經心諗:喂,PSP 年代《絕體絕命都市 3》個畫面都可能靚過你喎!

 

嗱,我玩過 PS4 個 Demo,正式版就玩 PSV,我可以好肯定咁話你知:佢畫質唔理想(或者你可以用強差人意或者係核突黎形容)呢個事實係同機種完全無關係嘅 LOL!畫面上你可以見到嘅野基本上全部都起角,人物頭髮撻成一塊……以下係我喺故事入面覺得比較萌嘅角色海倫娜,你睇下近鏡就知我講嘅起角係咩野一回事。

 

三、零探索性嘅場景

 

作為一個 RPG 遊戲,你無迷宮我覺得唔緊要,因為《蒼》唔係行 ADB 戰鬥系統,你玩打仗呀嘛。咁但係打仗都要抖下氣架?都要補給架?作為國家重要嘅棟樑,幫路人解決吓生活煩惱都好合理吖……?

 

唔駛期待,《蒼》唔止無支線任務、亦都唔會有比你探索嘅地圖,大街上面有藥店、買料整防具嘅舖頭(不過啲防具整唔整都罷)……僅此而已;而武器店呢,就只可以整到輔助用嘅槍,而唔係提昇你手持大劍嘅能力值!剩返嘅場景就係「出擊部」「酒館」同埋「皇家墓地」。

你可能以為,唔緊要啦,無支線咪仲快啲爆機……好,我欣賞你做人樂觀!不過我都要提提你,《蒼》係無得將個鏡頭轉黎轉去換視點架,佢逼你咁嘅角度望你就要硬食;你想睇真啲個城鎮?你想打仗時睇清楚個戰場?對唔住,唔得噃,個系統唔支援呀,係得一個視點架咋陰公~

 

四、戰鬥系統雜亂而唔實用

打仗係遊戲最重要嘅部份(亦可以話係惟一可以做嘅野…),玩家需要自己去總部度接任務,任務分為打極都有嘅「FREE」戰以及故事相關嘅「STORY」兩種。

 

戰場有分成「草地」或者「沙地」(雖然我完全感受唔到個分別)、敵軍有近戰、有槍兵同埋機器兵,唔同屬性嘅攻擊(火、土、風、水)會有機會對敵軍做成弱點傷害。除此之外,主角仲可以使用步槍、煙幕彈、手榴彈等配備品。而喺戰場上面,玩家亦可以因應唔同嘅地理環境而進行「偷襲」「埋伏」等等戰略;戰場上面亦會隨機出現寶箱。

 

好。戰鬥系統介紹完之後,係咪覺得個遊戲又好似無咁差?你會咁諗你就真係太天真!係,個系統係講到好完善咁呀,但係,角色要出屬性攻擊之前一定會 Lag 一 Lag、至於咩「地理因素」,算罷啦,我打左咁多場仗,個戰場畫面都係用緊同一個都算,你同我講地理因素,我會期待你最起碼有地形高低階段差(跌左落個坑度要兜大圈上返平地)或者再低能啲,天氣變化好未?

 

至於頭先提過嗰啲咩「利用地形優勢而進行埋伏」等等乜春嘅戰略,因為戰爭基本上太簡單嘅關係,你係就係可以用嘅,但係我全程基本上係無雙玩法:衝出去見人咪劈囉!反正啲雜魚同埋大將都係兩三刀就死,到打 BOSS 啲機甲兵或者「非大眾臉武將」先需要用下法術、放兩個手榴彈咁。戰爭模式本身又唔係好好玩,我真係無心機搞咁多假戰略(掩面)

 

咁玩無雙都可能會臨場出現突發任務,例如叫你去邊個據點突襲等等;但係《蒼》嘅額外任務呢,係事前話比你知嘅,你做到就做,做唔到亦唔會有損失;最無誠意嘅嘢係:啲額外任務仲要係循環出現架!咩野「擊破三名突擊兵」呢啲任務你做完之後又會再出現!當然啦,你可以「呀幾好吖啲獎勵咪可以無限拎囉!」咁諗嘅,如果你真心覺得佢啲獎勵吸引嘅話……:0)

 

喺無練級、無升裝、無用心(喂)兼用無雙玩法嘅情況下,玩家都可以每場戰爭拎到 S 級;你可想然知佢嘅戰鬥模式係幾咁有挑戰性,簡直係鼓勵玩家當自己戰神……喂唔好啦,打機無難度真係唔好玩架!

 

總結感想

作為一個 JRPG 愛好者,我都唔想將一個遊戲講到一文不值……但係呢個遊戲真係勾不起我的興奮!或者我已經比 Falcom 嘅優質 JRPG 縱壞左啦。對於一個聲優狂熱粉絲黎講,主角群出動到小野大輔、櫻井孝宏、坂本真綾等等嘅大手聲優,可能係《蒼》唯一一個賣點……但係好似我喺文章開頭提過,遊戲推進劇情嘅方式咁唔人道,想投入都難。明明第一代女武神幾好玩,第二代搞成咁,你都咪話唔失望!

 

神婆

為咗兩隻貓嘅生活努力奮鬥,遊戲雜食向,全種類 RPG 專攻,重度聲優控。

追蹤

Facebook 更多文章