大半年前，我地受邀試玩左 Sandbox VR (前身 GloStation) 嘅《屍森大宅》，冇留意過或者唔知係乜嘅就睇返舊文先！如果你知係乜又玩過嘅，你都會留意到佢地最近喺尖沙咀開多左間分店之外仲多左隻新 Game 叫《海魔的詛咒 Curse Of Davy Jones》，如果你就咁睇以為只係轉主題冇乜特別就真係走寶啦！淨係硬件上就已經多左幾樣野比大家。
- 空間大左，玩家數目多左，難度自然唔同左
之前嘅《屍森大宅》一次可以比 4 個玩家同時進行遊戲，地方叫做夠比大家走動下，不過玩家唔小心嘅話都會發輕微碰撞。尖沙咀嘅新場地，仲開多間 6 人房，兩隻 Game 都可以支援 6 個玩家同時進行，而且遊戲會因應人數而調整遊戲難度，就算之前玩過 4 人版嘅《屍森大宅》都可以再挑戰一次 6 人難度版本
- 戴眼鏡的人有福了
我地上次都提示過戴眼鏡嘅玩家係唔可以戴住眼鏡去玩(一係就只可以戴隱形眼鏡)，依家佢地直頭有埋唔同度數輔助鏡片借比一眾唔想戴Con嘅玩家。
- 新遊戲道具，增強臨場感
引入左 HAPTIC VEST 體感背心，前後夾埋有 40 個感應摩打，每當你遊戲中受攻擊嘅時候，都有同樣對應位置震動，製造一個更迫真嘅遊戲感受。
新嘅攻擊道具 – 火把，除左照明同攻擊之外仲有特殊用途，不過為免劇透就等大家玩嘅時候自己發掘啦！
- 重播錄影片段更精彩
舊作喺玩完之後，都有 4 條 Playback 比玩家選擇邊條 Share 上網比其他朋友重溫，但因為冇 capture 遊戲內嘅其他角色同敵人，除左見到玩家 4 個傻更更唔知做乜。新版本喺開始之前會為玩家錄返 8 秒片段做片頭，而且喺片中會有返遊戲中嘅造型、敵人、機關以及場景。
- 美中不足
《屍森大宅》遊戲中嘅角色係以唔同顏色去區分，雖然《海魔的詛咒》一開始嘅時候可以比玩家選擇角色造型，不過進入遊戲之後就冇玩家名稱標示邊個造型，而且多左玩家同場嘅情況下，遊戲初期係會有少少嘅混亂。
而且《海魔的詛咒》相對難度比《屍森大宅》容易，如果係一班有返咁上下 Game 齡嘅玩家應該會輕易破關，不過遊戲中嘅關卡謎題係新穎有趣，相比同類型嘅遊戲館更加有新鮮感。
《海魔的詛咒 Curse Of Davy Jones》 by Sandbox VR
地址︰尖沙嘴金馬倫道5號太興廣場4樓
時間︰星期一至四中午12時至晚上11時30分；星期五至日上午11時至晚上12時
費用︰繁忙時間每位$280、非繁忙時間每位$180（星期一至五下午6時前）。
體驗時間︰60 分鐘（15分鐘遊戲介紹及進入虛擬世界、30分鐘遊戲時間及15分鐘返回現實世界及重播精彩時刻）
預約網址：//sandboxvr.com/hk