Marvel Studios暑期鉅獻《蟻俠 2：黃蜂女現身》上映在即，喺《復仇者聯盟 3：無限之戰》票房熱爆全球嘅利好因素帶動下，令影迷們對《蟻俠 2》又再睇高一線，必睇指數不斷急升！
- Marvel Studios 10周年2018壓軸篇
緊接《復仇者聯盟 3》上映嘅《蟻俠 2》係Marvel Studios 10周年第三擊，亦係2018年壓軸之作，正所謂睇戲睇全套，睇咗《黑豹》同《復仇者聯盟 3》，點可以唔睇埋《蟻俠 2》？！ - 超貼地勁抵死更玩嘢
「蟻俠」可以喺一眾超級英雄中突圍而出，勝在夠貼地夠抵死，今集延續上集風格，將會有更多地道幽默笑料，玩嘢玩得更盡！尤其見於「蟻俠」同外號「黑歌利亞」嘅新角色 Dr Bill Foster 之間嘅”角力”，預告片中已經見佢同「蟻俠」一味鬥「大」！「蟻俠」好拍檔路易亦會回歸，同佢出生入死之餘，繼續拍住上搞Gag，抵死笑料層出不窮！
- 全新拍檔「黃蜂女」型爆登場
當然今集最吸引係「蟻俠」有全新拍檔登場，女主角伊雲祖蓮莉莉化身型爆「黃蜂女」，同「蟻俠」拍住上保衛地球！「黃蜂女」身手不凡，尤其裝備武器比「蟻俠」強勁，兩人合力出擊互相照應之餘，亦有暗中較量兼鬥咀鬥氣，更會逐漸發展感情線，令劇情更加豐富有趣！
- 由「細」玩到大 觀眾期待度高達99%
「蟻俠」本身亦實力雄厚，續集預告片一出，立即大獲好評，觀眾期待度高達99%！由預告片可見，上集主力玩「細」的《蟻俠》，今集愈玩愈大，「蟻俠」裝備同戰鬥力全面提升，縮細之外更可化身超巨大「蟻俠」，又有玩味十足嘅飛蟻代步、巨型Hello Kitty皮禮士糖做武器，片中更提及量子界中門大開，引出瘋狂恐怖反派 – 幽靈！可以預期今集將會有更多刺激動作、頂尖特技大場面，放大縮細玩到更盡，「細」必超越前作！ - 揭開「蟻俠」缺席《復仇者聯盟 3》真相
2015年《蟻俠》上映，全球勁收5.19億美元，叫好叫座，俠氣急升，成為最受歡迎新超級英雄之一！《復仇者聯盟 3》公映之前，粉絲們網上熱烈討論「蟻俠」會唔會喺戲中現身，可見大家對呢位超級英雄嘅熱愛同期待！最終「蟻俠」缺席《復仇者聯盟 3》，確實令唔少影迷失望。
電影中有提及到「蟻俠」接受軟禁，但佢喺《美國隊長3：英雄內戰》力助美國隊長之後何去何從，箇中的來龍去脈，就要留待《蟻俠 2》先會為大家揭曉！ - 破解《復仇者聯盟 3》謎團
《蟻俠 2》嘅時間設定喺《復仇者聯盟 3》之前，《美國隊長3》之後，所以呢部續作有機會解開《復仇者聯盟 3》嘅謎團！
其實《復仇者聯盟》導演羅素兄弟接受訪問時亦透露過《蟻俠 2》同《復仇者聯盟 3》劇情最有關聯，復仇者粉絲真係唔睇唔得！
- 鋪排《復仇者聯盟 4》重大關鍵
今集仲有金球影后米雪菲花加盟助陣做「黃蜂女」媽媽。上集有提到呢位第一代「黃蜂女」被困喺量子界下落不明，估計今集「蟻俠」會同新「黃蜂女」去量子界尋母，網民推測呢個鋪排會成為《復仇者聯盟 4》的重大關鍵！
- 復仇者紅星全力撐場造勢
《蟻俠 2》同《復仇者聯盟 》關係密切，亦由一班復仇者紅星為《蟻俠 2》預告片首播撐場，當日「黑寡婦」施嘉莉祖安遜、「奇異博士」班尼迪甘巴貝治、「洛基」湯赫度斯頓等齊齊拍片回應點解「蟻俠」冇參與《復仇者聯盟 3》，其中「洛基」笑言：「佢可能有在場㗎，只係太細大家睇佢唔到啫！」
