【有片】《Assassin Creed Odyssey》搶先實機體驗 絕佳遊戲品質揭開刺客新紀元

萬眾期待既《Assassin Creed Odyssey》雖然要等到十月先推出,但係我地非常榮幸到到 Ubisoft 既邀請,實機測試尚未推出既本作。由於相關故事內容唔能夠透露既關係,所以我地將集中講述遊戲系統以及整體感受,而我地試完《Assassin Creed Odyssey》都有強烈既感覺,就係「Ubisoft 終於擺脫 Trailer 大廠之名啦!」。

 

實機遊玩畫面截圖!

 

遊戲開始以一場非常知名既戰役作引子(請自行想像),完成一般操作之後遊戲正式開始。今集係首次容許玩家選擇使用男或女作為主角,而且同《Assassin’s Creed Syndicate》唔同,揀咗男做主角係遊戲中就唔會見到女主角,中途亦都不能更換,只能二擇其一,屬系列新嘗試。

 

 

係使用 PS4 Pro 實機遊玩狀態下,畫面表現比《Assassin Creed Origin》更為紮實,而且製作組明顯有聽玩家意見去改善系統,前作唔少有問題既野我地遊玩過程中都無發生,最明顯既例子就係騎馬時使用自動導航,前作會經常出現行錯/兜遠路甚至卡住等問題,黎到今集已經得到改善。

 

畫面表現非常之好

 

今集提供四個難度選擇(可於遊戲途中更改難度),選擇完難度之後就會叫你選擇模式。遊戲提供二種遊玩模式,一種係沿用一貫玩法既傳統模式,另一種則係強化版既「探索模式」(同前作探索模式唔同)。係「探索模式」下,接取任務後將不會於地圖標示下一步地點,需要玩家透過與任務提供者對話又或者其他線索尋找下一步所在地。係該模式下遊戲體驗變得更為真實,同 NPC 對話唔再係純粹快手飛字幕,而係從對話中獲得所需情報。當然話就話係探索,但唔會話難到要玩家去到某一個點先會啟動任務下一步,只要去到任務所形容既地區,再利用鷹搜尋就好快搵得到。係試玩過程中,可能係因為我地玩最困難難度,索敵時範圍變得非常細,所以係偵察階段需要更細心地搵出據點每一位並標記佢。

 

「探索模式」下將不會於地圖標示任務下一步所在地

需要係對話當中尋找線索

去到任務所在地區會提示用鷹搵出確實目標地點

有趣既係好多對話選項上面都可以做衰人,i like it 🙂

 

戰鬥系統同上集相似,依然係 R1 輕斬、R2 破防重斬,而最大改動主要有二個部份。其中最主要既改動就係今集加入咗主動必殺技,升級後可以係技能樹度學習,係 Trailer 入面果下斯巴達絕技「Spatra Kick」就屬於主動必殺技,學習後可於快捷列設定,最多可以設定近戰四招及遠攻四招。

 

主動必殺技我地學咗「滲毒」技能,效果都幾一般……

 

另一樣改動就係盾反,按 L1 + R1 就會進入格檔姿勢,動作大約會持續一秒。於此狀態下會自動格開敵人打擊技並製造空檔,對比起前作盾反,變得較容易使用及大大降低風險,相信會令唔少玩開閃避流既朋友加入盾反流行列。

 

盾反變成低風險高回報招式,相當好用

 

另外鐘意向難度挑戰既朋友,相信《Assassin Creed Odyssey》可以滿足到你。我地係遊玩過程中發現,係最高難度下,玩家終於變返做「刺客」,而唔係「戰士」。我地跟隨住線推進,即使已換成該等級下最高攻擊力武器,仍然無法一擊暗殺比你高一級既敵人,變相大大加強潛入難度。而且會追殺你既傭兵變得極之強大,想越級挑戰接近係唔可能,玩家終於可以感受被追殺既感覺!

 

可以見到無法一擊暗殺比你高等既敵人,即使只係高你一級

系列招牌動作開地圖當然健在

另外三個典藏版《Assassin Creed Odyssey》雕像亦率先同大家近距離睇清楚,三個不同版本各有特色之處,大家睇啱邊款就襯早訂啦!

  • 梅杜莎典藏版

  • 斯巴達典藏版

除左底座同梅杜莎典藏版唔同,武器亦由短刀變為長矛

  • 萬神殿珍藏版

萬神殿珍藏版係以斯巴達典藏版雕像再配上復仇者雕像去做出殊死戰場景組,製作出對戰時嘅超迫力感覺。

《Assassin Creed Odyssey》將於 10 月 5 日正式推出,對應平台為 PS4 / Xbox One / PC,支援繁體中文。

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章