【光劍與靈刀對決】中二病爆發 喪劈喪斬堅好玩 – Kyberlight

上星期介紹過把《Overwatch》源氏嘅「龍一文字」,雖然又靚又正但可惜拎嚟對打就真係唔多掂。就算 Hasbro定Master Replicas所出嘅 Force FX  產品,你係《星戰》迷又捨唔捨得拎佢嚟對打??

謎之聲:『前嗰排好紅嘅台灣光劍達人馬可多嗰啲又點先?』

馬可多大人嘅寶劍當然高質,不過香港人性格就係唔鍾意等。你要經過佢問答考驗再等佢每個月配額「鑄劍」,可能到時都唔記得左件事。


其實兩年前已經見過一個第三方光劍品牌叫 KyberLight,基本上同市面上嘅光劍都差不多,光度、聲效、打擊效果都有,唯一少嘅係冇左開劍由底光上頂嘅效果。不過當時佢標榜一樣好重要嘅野,劍身(Blade)就算比架車碌過都唔會有事。而且仲要係終身保養,真係不幸打斷左嘅話,只要扭返鬆啲螺絲拆返劍身條「屍骸」寄返比佢地,KyberLight 會包郵費寄返件新嘅比你!如果係整唔見之類,劍身嘅價錢都只係 $19.99 美金(約港幣 $156)。
Blade Warranty

大鎚打定比車碌過都一樣冇事

另一樣特別之處係佢劍柄上頭、中、尾三部份都有配件可以玩家自己配搭,去做出獨有嘅款式。而且組裝非常簡單,六角匙內備用螺絲都包埋。

Endless Customization

配件版包埋 3 款手把,頂、底配件各有 4 款,而且仲有埋個連接器比你駁埋兩把劍扮 Darth Maul

而且佢係用叉電,不過玩之前記得叉滿,唔係嘅話打打下冇電都幾無癮

聽落的確幾吸引呢?不過比個冷靜空間你,事關 KyberLight 單買一把普通版嘅起錶價係 $199 美金(約港幣 $1555),而多配件版係 $299 美金(約港幣 $2337)。當然你一次過買幾把係會平啲,撞正啲推廣優惠 Discount,咁價錢就隨時平過孩記出嗰啲 Force FX。


頭先我地講把劍好多地方都有配件去改到自已最鍾意嘅版本,而最近仲有一樣最值得推介比大家嘅 KyberLight 新配件登場。今次玩到刀刃都可以改,雖然就冇 Kylo Ren 嘅十字劍款,不過有一啲係其他光劍品牌未必做到嘅款式。

四款新配件劍身(Blade)左起:比利時花劍、維京大劍、日本武士刀、彎刀

作為中二病人,新配件首選一定係日本武士刀。將光劍嘅劍身換出插把武士刀嘅劍身落去,再扭返實兩粒螺絲就輕鬆完成

開著左之後嘅效果,紫藍色有冇啲諗起《鬼武者》嘅舞雷刀?

如睇完真係有興趣買嘅,去返 Kyberlight 官方網站慢慢揀啱自己想要劍Set同配件。而目呢排佢做緊萬聖節優惠,平左之外仲送多 3 件配件,要買嘅就襯 10月 31 號前呢個優惠入手啦!

Kyberlight 官方網站傳送門

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章