【我有一個夢】FromSoftware PSVR 遊戲《DÉRACINÉ》真係有《Bloodborne 2》彩蛋?

 

曾經製作出成為唔少玩家心中 ARPG 夢魘 經典遊戲《Dark Souls》、《Bloodborne》等等嘅 FromSoftware,佢地首個 PSVR 對應遊戲《DÉRACINÉ》已經於 11 月 6 日上市(詳文按此

呢個遊戲目前我仲未開始攻略,但係網上面唔少玩緊嘅朋友都話好驚喜,一來遊戲係 FromSoftware 難得地帶有溫情之作(雖然都富有暗黑色彩),二來,根據我網上觀察所得,唔少資深 FromSoftware Fans 都表示「《DÉRACINÉ》有彩蛋講緊《Bloodborne 2》!」

彩蛋(1):根據網友 Amazing Komaru 嘅 Youtube 片段分享,遊戲入面有隻公仔叫做「Fiona Doll」,玩家拎起佢時,佢嘅介紹如下:

 

 

全文文字為:
A doll of the stone girl Fiona who appears in the unfinished tale.
When a person has a bad dream, Fiona appears and helps them flee.

個人不負責任中文翻譯為:
菲安娜出現在一個未完結的故事裡面。
當某人遇上惡夢之時,菲安娜會出現並幫助他逃離黑暗。

有玩過《Bloodborne》嘅朋友,見到呢段文字,係唔係有少少毛管戙?因為呢段字令我不期然聯想起獵人夢境,同埋,假如你有玩哂《Bloodborne》三個結局嘅話,你絕對會明白當時遊戲中「The Doll 人偶」與玩家之間嘅關係。

彩蛋(二):喺 Fiona 段說明完左之後,佢會慢慢咁樣擺動雙手,心水清嘅朋友,絕對會發現佢擺出嘅姿勢係《Bloodborne》裡面其中一個玩家可以同其他獵人互動嘅動作:

 

圖片來源自網路(piccio_ssl @resetera)

 

最後,當玩家睇完 Fiona 嘅動作之後,遊戲中會出現「connected」嘅字眼。是否可以理解為 FromSoftware 嘗試比玩家一種暗示,就係《Bloodborne 2》正邁向玩家嘅世界呢?

彩蛋(三):玩家之後回頭再搵 Fiona 嘅時候,會發現佢手上握著另一個細小的玩偶;玩家如果拎起佢嘅玩偶查看,會發現個公仔赫然係《Bloodborne》裡面常見嘅觸手 BB!

 

圖片來源自網路(piccio_ssl @resetera)

 

全文文字為:
A statuette of a seafaring sage that appears in an unfinished tale.
It is said to appear in bad dreams, to watch over those who attempt to leave.

個人不負責任中文翻譯為:
一個從海而來的智者塑像,出現在那個未完結的故事裡面。
據說會在惡夢裡面出現,監視著那些想要離開夢境的人們

據說呢三個彩蛋出現之後,網上出現左一片《Bloodborne 2》嘅熱烈呼聲,儘管有冷靜網友表示「可能只係玩噱頭啫」,但係依然無法解釋「unfinished tale」呢個字眼何以會出現在《DÉRACINÉ》裡面。

根據我對 FromSoftware 嘅了解,佢地明知道玩家對《Bloodborne 2》係幾咁熱切期待,所以斷唔會用呢樣野為噱頭黎開玩家玩笑,這太不像他們的作風了;而且無論係《Dark Souls》或者《Bloodborne》都好,遊戲中裡面出現過嘅暗示,一定唔會係毫無意義的。

當然,一日未有官方消息出現,我都會叫自己保持冷靜觀望態度;不過,面對今次出現嘅彩蛋,我始終係開心的,因為 FromSoftware 或者係用緊佢地嘅方式話比 Fans 知,「你們要的我們都知道」?

相信《Bloodborne 2》在未來數年,還是會來到玩家身邊來吧。

利申超鍾意《Bloodborne》❤

最後送上網友 Amazing Komaru Youtube 上分享嘅片段:

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

追蹤

Facebook 更多文章