【無限炎上】《Fallout 76》200 蚊美金「Power Armor edition」貨不對辦仲大量洩漏用家資料

 

《Fallout 76》推出以黎炎上不斷,我地本身都對遊戲有幾大期望,但係而家……

OK 今次重點唔係呢樣,如果你以為炎上嘅只係令人氣惱嘅只係遊戲系統,咁真係太天真了!因為原來離開遊戲之後,Bethesda 社早前對外發貨嘅《Fallout 76 Power Armor Edition》同樣炎上到下世紀,一波未平,尋日又爆出大量洩露客戶資料事件,今次真係唔知 B 社點收科?

《Fallout 76 Power Armor Edition》價值 USD 199.9,換返做港紙即係大約 HKD 1,600;呢個 Set 包含「West TEK 萬用帆布袋 x1」、「1:1 Power Armor 頭盔」以及其他周邊。咁問題出喺邊?

 

 

問題就係個「萬用帆布袋」到買家手上面嘅時候無啦啦變成尼龍袋,「尼龍」同「帆布」都有好大段距離喎大佬?你喺唔通知買家嘅情況之下,擅自更改材質都算,咁「萬用」呢?唔少買家喺 Reddit 以及 Twitter 上面分享自己開箱畫面,個袋嘅質地薄如紙呀,以前買廿幾蚊漫畫月刊送嘅周邊袋仔可能質地都靚過佢呀!

 

你原本話係咁

黎到變成咁 @Polygon

黎多個近鏡係咁 @Imgur

 

然後有玩家話不如你咁樣罷啦,都無咩分別……

 

 

B 社見到炎上咪衝出黎認衰同撲火,話唔滿意嘅用家可以去留低 Contact,官方會盡快比返個「帆布袋」佢地,仲賠償左雞碎咁多嘅遊戲代幣 500 Atoms 打算息事寧人啦,但係我話你知好戲在後頭……

 

 

事緣就係,好多玩家就走去 B 社提供條 Link 度留低個人資料,一心諗住等換貨,點知入到去 Submit 完先發現:點解我可以見到其他玩家嘅住址、全名同埋信用卡資料架?!

 

 

唔少網友見到呢件事,都叫 B 社洗定屁屁,仲有部份玩家嬲到準備出律師信告 B 社咁話。其實《Fallout 76》推出唔夠一個星期,B 社即刻將遊戲減價已經激嬲唔少玩家,而家你啲屎一件接一件,就算你黎緊遊戲個 Patch 整到隻遊戲好似《GTA V》咁完美都無可能挽回到一眾玩家嘅心架喇噃!B 社今年是咪犯太歲呀?

無啦無啦,原本外國各個遊戲大媒都忍口唔一出 Game 就出文話你,但你裡裡外外嘅營運都搞成咁,相信今次真係個個都幫你唔落了~

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

追蹤

Facebook 更多文章