【似乎可以安心】《Anthem》最新實機遊玩片 完美展示機甲特性

相信唔少人係 2019 年最期待既大作一定有《Anthem》(冒險聖歌),不過大家都對 EA 二隻字非常敏感,加上官方保密功夫做到足,對上一次 Close Test 有人想直播都秒被 Ban。咁耐以黎都係得 E3 展示片睇,實際遊戲玩落係點都仲係成謎。不過外媒 IGN 日前正式有長達 15 分鐘既實機試玩影片放出黎,睇完之後只可以用話係「掂」!

 

 

今次實機遊玩片段主要係進行「Lost Arcanist」呢個遊戲前期教學性任務,叫得係教學性任務,即係主要話你聽遊戲基本操作係點,例如教你點飛、點樣攻擊敵人等等。雖然係教學任務,不過片段中展示咗截擊、巨象、暴風三套裝甲,而且都幾全面咁展示各機甲當中既特性,非常精彩!

 

 

係片段當中我地見到截擊機甲擁有多段跳躍、優勢既 Boost 量等等,官方亦都形容為最精巧、流暢既機甲,擁有最佳靈敏度與迴避率,而且更有華麗既空對地格鬥攻擊。另一套巨象機甲,動作遲緩但擁有高傷害、高防禦力以及明顯短既 Boost 量,而且巨象機甲亦都係遊戲內唯一擁有足夠力量使用重型武器既機甲。係影片入面我地仲可以見到巨象機甲係有盾用的!

 

截擊機甲空對地格鬥技非常華麗

巨象機甲有盾,打坦位無誤!

仲有驚人破壞力既重武器

 

最後就係暴風機甲,使用叫做「徽章」既力量。基本上即係魔法師,擁有冰、火、雷三種屬性攻擊,破壞力驚人,不過防禦力低下。根據官方解說此機甲屬於高手向使用。

 

暴風機甲擁有三種屬性攻擊,而且攻擊距離係三機甲之首

 

雖然仲有一種機甲並未展示,但係每種機甲特性都非常明顯,而且玩家可以隨時轉換機甲類型,亦即係同一遊戲多種玩法。如果淨係想玩死一種機甲都無問題,因為每件機甲都可以裝兩件武器,並能夠在任務之間改變配置,亦即係話就算同一套機甲大家武器技能裝備都會有所分別。

 

 

《Anthem》將會在 1 月 25 日開放 VIP 用戶試玩,2 月 1 號就正式對所有玩家開放,大家拿拿臨搵定腳組隊啦!遊戲對應平台 PS4 / Xbox One / PC。

五木

動漫電玩宅,極愛金田一系列,擅長動作及策略遊戲

追蹤

更多文章