【台北電玩展 2019】超注目試玩攤位《SEKIRO 隻狼》1:1 破戒僧精細度爆燈!有玩家話睇哂攻略先黎試玩……

 

如果有去過 2018 年「東京遊戲展」嘅朋友,應該就對《隻狼 SEKIRO》呢隻 1:1 大小嘅「破戒僧」唔會感到陌生;呢隻壓場感十足嘅 Figure 係第一次喺日本以外地方展出,Sony 同埋 FromSoftware 山長水遠都要將佢由日本運黎台北,真係可見對今次「台北電玩展 2019」嘅誠意!

除左 1:1 大小之外,連破戒僧身上嘅袈裟以及念珠都有好好表現出黎,如果遊戲推出之後,會出埋佢嘅 1:16 Figure 都真係幾大鑊,我一定會忍唔住課金……

 

啲材質靚到癲

 

早前我地痴線而強大嘅總編輯,已經喺香港試玩過《隻狼》並成功通關,但係,由於《隻狼》其實難度極高,難到 喺 2018 年東京遊戲展嘅試玩攤位,係無玩家過到關的!

我記掛住呢樣野,於是我呢幾日一路採訪,一路都會留意住「《隻狼》挑戰英雄榜」到底有幾多玩家通到關。

 

 

但係,去到第二日我就驚見成功挑戰人數已經有接近 30 人!點解 TGS 2018 一個人都過唔到,但係黎到 TPGS 2019 就咁快咁多人過到架?於是我就厚住面皮,走去同成功玩完嘅玩家傾左兩句。

原來佢地有唔少人係聽聞遊戲極度難玩,但係現場人數太多,每人只能夠有一次試玩 Quota,為左把握呢個機會,唔少朋友喺活動前上網睇哂所有試玩攻略、試玩片段,總之就務求溫哂書先入場考試咁嘅款;不過當然亦有玩家係實力超凡,初次落場就成功通關,真係要令人寫個服字。

好可惜玩家朋友 Tony 唔想上鏡,所以無得影佢大頭;不過謝謝你跟我們的分享喔!

 

 

有興趣睇返我地總編試玩報告嘅,可以參考以下連結:
【試玩評測】《隻狼:暗影雙死》試玩台首現香港 難度超越過往作品

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

追蹤

Facebook 更多文章