新年檔期就要睇賀歲片 《銃夢:戰鬥天使》打到飛起迎豬年

《銃夢》漫畫係 1990 年連載,亦都係我童年最愛既漫畫之一,當知道呢套作品會拍真人電影既時候都咪話驚,事關差唔多套套真人化電影既動漫 / 遊戲最尾都變成原作破壞者。不過《銃夢:戰鬥天使》乃係由占士金馬倫所監製,成件事又有返啲信心!

 

 

《銃夢:戰鬥天使》劇情大約係原作漫畫第一到第三集之間既故事。故事發生係一個叫「廢鐵城」既地方,由天空城市「薩雷姆」所支配,生活係廢鐵城既人都夢想可以前往天空城市生活。一日,廢鐵城專門幫助生化機械人既醫生「依德」,係廢鐵城垃圾堆入面執到腦狀態仍然生存既生體合成人上半身,依德將佢救返之後發現佢已經失去已經既記憶,並幫佢改名做「Alita」。係一次意外入面依德發現 Alita 腦海深處潛藏住火星古武術「機甲術」既記億,之後就踏上找尋自己身份之路。

 

 

眾所周知,電影化好多時失敗係因為妄想將數十本漫畫所有內容濃縮為幾小時影片,黎到《銃夢:戰鬥天使》占士金馬倫就將劇本修改得非常漂亮。劇情改動得非常完整,而且好多經典場面都有出面。眾多改動當中,原作漫畫入面,「Alita」呢個名係屬於「依德」死去狗隻既名字,黎到電影版則改為係「依德」死去女兒既名字,更加入女兒被合成生化人殺死既設定。呢個改動加強咗依德成為 獵人既理由,亦都令強化依德對 Alita 既情感系出於父愛,改動得非常之好。

 

 

一般電影所營造既 Cyperpunk Feel 就係濕立立加大量霓虹光管,即係類似《攻殼機動隊》果種。不過係占士金馬倫手下反而係充滿貧民窟味道加上各種人種,感覺雖然貧窮但係孕育住自己既文化,頗有特色。

 

 

而最為人詬病既就係 Alita 充滿不協調感既超大眼,不過係電影中睇睇下又會順眼咗,未至於好突兀。電影前半段節奏比較緩慢,相信係為咗照顧無睇過原作既朋友,所以係建立世界觀同角色形象方面花咗頗長時間,去到電影中段就開始入大直路,Keep 住有打鬥場面,大家可以放心!

 

 

打戲場景接近每場都會出同一招(亦都證明敵人唔係聖鬥士,唔係點會中同一招二次),不過整體動作非常流暢亦都有質感,加上對戰雙方都係經過改造既合成生化人,整套電影雖然一滴血都無,但係插眼斷手斷腳全部出齊,感覺同樣豐富。不得不提既係「死亡球」拍得比我想像中更有速度感,抵讚!

 

 

作為 Fans 唯一挑剔既地方就係原作中第一部佔好重戲份既敵人「馬卡克」,係電影版變成一位非常普通並無著墨既壞人角色,即使去到地下世界戰鬥,其實亦都只不過係轉場打而已。而係原作中馬卡克要依靠吸食腦漿去緩和痛楚,手段極之殘忍而且極為卑鄙,但係當揭露佢成長既經歷後,主角亦有施予一絲既憐憫,呢點係電影版反而被比下去。(成套戲入面,依德反而最有原作味道)

 

整體黎講,《銃夢:戰鬥天使》水準甚高,以真人化改編作品黎講甚至超出預期,賀歲片首選!順帶一題,本電影 3D 效果做得非常出色,建議比多少少錢睇 IMAX 3D 版本,反正一係唔睇,要睇就睇最好啦,係咪?

 

五木

動漫電玩宅,極愛金田一系列,擅長動作及策略遊戲

追蹤

更多文章