神谷英樹爆製作《Biohazard 2》秘聞 原來 Ada Wong 只係「隨手」整出黎!

《Biohazard Re:2》大家都應該爆到唔知第幾週目,不過原來當年製作原版果陣係有唔少秘聞,最近就由當年有份製作《Biohazard》、《Biohazard 2》既神谷英樹係 Twiiter 上面連續大爆當年呢啲軼事(條友係 Twitter 好多野講,正宗口水佬一名),而且仲幾有趣添!

 

 

《Biohazard 1》入面差唔多全部都係由遊戲編劇岩尾賢一負責,當中包括浣熊市、Umbrella 公司、T-Virus、S.T.A.R.S.、暴君等等。而取名浣熊市原來係因為當時岩尾先生話「美國經常會使用動物名稱黎幫城鎮命名」,而佢又幾鐘意呢樣野……

 

 

跟住神谷又講到原來而當時既主帥三上真司先制定《Biohazard》既故事主軸係因為生物技術所引起既喪屍事件,之後再由神谷熱心地遊說三上,最後先會出現由岩尾所設定,大家熟悉既 S.T.A.R. Alpha Team 出現(即係 Wesker、Chris、Jill 既小隊)。

講到 Wesker,呢條友除咗出名打極唔死之外,係我地朋友間仲有個外號叫「黑超佬」,不過原來一開始設定時係無帶超呢個設定,係趁住當時每個工作人員設計都未完成時加入。

 

然後神谷就講到岩尾係做完初代《生化危機》設定之後就離開咗 Capcom,所以當中有啲細節製作團隊並唔係太清楚,所以製作《生化危機 2》果陣,就搵埋編劇杉村升一齊開會。係會上杉村問到係《生化危機》研究所有個密碼係「ADA」,到底係咩人黎既時候,神谷就話「係門井寫架,我唔知道架」,於是就打電話比當時擔任遊戲設計師既門井一憲(佢亦係《Biohazard Re:2》既遊戲監督》)。係電話入面,門井當時就咁樣答:「其實只係隨手加入去……」,原來之後大受玩家喜愛既 ADA 就係咁誕生……。

 

 

另外原來當初《生化危機》係第一身遊戲,類似《Doom》咁上下既野,亦都有好多唔同既趣聞,有興趣可以上神谷個 Twitter 睇下。(不過條友真係好多口水…..有排搵的)

五木

動漫電玩宅,極愛金田一系列,擅長動作及策略遊戲

追蹤

更多文章