《隻狼：暗影雙死》成為近期大熱遊戲，同時亦都好多人因為佢既高難度而卡關，當然亦有人抱住觀望態度諗住睇定啲先。咁到底呢隻 Game 係咪真係咁好玩？點解要將難度設定得咁高？點解有班人鍥而不捨咁去挑戰？我希望以自己既理解嘗試去話比大家聽，到底《隻狼：暗影雙死》既魅力係邊度。
由於今次呢篇係感想文，有關系統野唔會講太多，想知道遊戲基本技巧既可以睇返呢篇【遊戲速評】
首先，好多人都會話我打機求 Happy，唔係想玩死，呢啲自虐 Game 唔啱我等等理由，原則上係無錯的，我絕對認同。不過 From Software 呢間公司出品既遊戲提供比大家「Happy」既定義有啲唔同，因為佢地出品既遊戲不論係《Dark Soul》系列、《Bloodborne》都係需要玩家死幾廿萬次的，而新出既《隻狼》更加係表表者，操略估計我一周目爆機死亡數起碼有 2 – 300 次，咁點解仲會有人甘願受虐？（喂我唔係 M）
《隻狼》呢隻遊戲比到一種現時非常缺乏既遊戲體驗我地，簡單講就係並非單純地令遊戲角色成長，而係伴隨住遊戲角色同佢一齊成長。呢一種遊戲體驗對機齡深既玩家相信會好有感受，因為我地細細個就係受到高難度遊戲如《魔界村》、美版遊戲（紅白機既美版遊戲難度係痴線的）訓練長大的，死已經變成係習慣。
死亡率極高最主要原因係因為《隻狼》呢隻遊戲，每隻精英怪、Boss 都擁有自己一套模式，而且並非單一套路，敵人會隨時變招甚至有假動作，令到每次對決都係全新體驗，玩家無法使用同一種打法應付所有敵人，呢點係《隻狼》吸引點之一。
第一次打呢隻野打咗個幾鐘，因為太多花招，每招既出招時間都頗大差異，對新手黎講唔易對付。當經過劍聖既訓練之後，佢係我眼中只不過係回血工具。
另一個吸引之處係，每個人透過死亡 > 再戰 呢個循環慢慢會摸索到攻略既技巧，而特別既地方係每個人攻略既方法都會唔同，採用完美擋格？閃避？拉距離磨血？各有自己玩法，加上每人習慣不同而令到使用既奧義、忍具都有所不同，令到攻略方式極為多元（所以唔建議大家上網睇攻略片，自己摸索既樂趣係與別不同的）。而且當你發現某樣忍具甚至係道具有效時，果種驚喜係非常之難以形容的。
打火牛開頭都死咗四、五次，然後醒起「爆竹」忍具上面寫住動物類會害怕既解說，再搵返佢測試證實諗法無錯，果種喜悅係特別唔同的
其實堆道具好多都有解說
從中亦都了解到宮崎英高透過《隻狼》帶出一個訊息，佢希望大家學到呢樣野：通過克服困難讓玩家體驗到成就感。要知道好多人面對困難會選擇走捷徑（例如開外掛、睇片 Copy 人地打法等等），但係當你咁做時你就永遠無法體會到遊戲所帶黎既真正既魅力所在。
呢隻山內式部利勝號稱新手殺手，我都死係佢手上無數咁多次。據聞有人打佢打咗七個鐘都仲未贏到，不過之後你就會發現因為有佢你先學識遊戲點玩，真係要講返句「多謝」。
而一隻遊戲既好與壞，戰鬥系統往往佔評分中極大比例，《隻狼》係呢方面簡直係「完美」。遊戲中主要玩法就係打爆敵人既「軀幹值」，然後施展忍殺。「軀幹值」可以透過攻擊命中敵人、完美擋格、技能「識破」等手段增加，而玩家方同樣有呢條「軀幹值」，所以每次攻守都非常刺激，我地叫呢種攻守做「對刀」，熟練之後既對刀過程就有如電影中武士劍戟交鋒既場面，簡潔有力。
《隻狼》呢隻遊戲會令玩家逐步成長，因為宮崎英高佢好巧妙咁將整個教學隱藏係遊戲流程入面，只要勇敢面對每位敵人將會磨練出各種技巧。好似正常流程第一隻 Boss「幻之阿蝶」其實係教緊你要勇於對刀；而被稱為新人殺手既「葦名七槍 山內式部利勝」係教緊你用技能「識破」、「完美擋格」等等，面對種種強敵，當你戰勝之後除咗興奮地大叫「Yes！」之外，仲會令你有種「就算再打一次我一樣有信心贏」呢種感覺。
依靠自己摸索，打咗二個鐘先贏到。到而家仲記得果種興奮之情。
係呢種強化自身技術既過程中，你將會發現你想要既並唔係「快手打死隻王衝進度」，而係「享受同強敵對戰既樂趣」。
諗返初見「葦名弦一郎」時只係捱到十零秒，到天守閣要再戰時，心入面果種怯。然後經過劍聖一心訓練之後……我諗佢覺得我先係劍聖。
除咗戰鬥系統出色，《隻狼》故事亦都有滿滿 From Software 既影子。遊戲並非單純出段 CG，再加一大堆解說咁去同你講故事，而係透過各種道具、周邊環境等線索逐步去建構返故事全貌。而遊戲中各 NPC 都有自己既故事，雖然佢地戲份大都唔多，但係角色刻畫極為鮮明，令人印象深刻。
陣左呢位角色，無論選擇咩路線都只有一個下場，好悲哀
短短幾句文字，就帶出獅猿係有感情之物
即使無乜戲份既 Boss，透過解說已經可以解讀返點解佢會負責守住仙峯寺長廊
遊戲中透過各種改編日本民間傳說，例如破戒僧既故事、白蛇同獅猿既傳說等等，去建構遊戲故事，成功再次令玩家們集體去發掘及討論劇情，手法非常高明。
淤加美呢個詞黎自日本神話中既淤加美神 – 龗神，即係水神
鯉魚王成條故事線都係悲劇黎
知道「嗟怨之鬼」真實身份後都幾可憐佢
臨尾講少少「對刀」心得（無興趣既請 Skip）
不論係攻方定守方，被攻擊者只會有三個狀態，分別係 命中、擋格、完美擋格。命中敵人情況下，可以放心再斬多刀（大硬直）；如果攻擊被敵人擋住，並且有細聲既金屬碰撞聲+小火花，代表守方只係普通擋格，守方增加「軀幹值」，多數情況下都可以斬多刀（小硬直）；如果攻擊被敵人擋住，並且有大聲金屬碰撞聲+大火花，攻方會被彈刀 / 震退，所以見到大火花出現下一步一定要擋 or 閃避。（用忍具「霧璃鴉」或者「傘」都可以）
見到大火花+大聲金屬碰撞聲就好縮手
除咗以上狀態外，仲有「危」狀態，「危」狀態下多數攻擊不能擋格，只能閃避或者跳躍（上面二種忍具、或用對突刺攻擊使用識破）。而面對劍聖呢類 Boss 時，「危」狀態仲會變招，係呢個時候係極考驗反應力同應變能力。同時亦都記住盡量搶佔戰鬥主導權，因為《隻狼》係主張主動進攻，唔係話打後手防守唔得，不過由玩家掌握主導權比較有利。大部份情況下敵人無先先出手的話，玩家可以搶先進攻，如果對方啱啱想出手的話就會自動變成格擋或者中招。
當然有時敵人會打亂你節奏，令你搶唔到主導權，係呢個時候可以選擇用「手裡劍」，強制打斷敵人節奏再把握時機切入。
其實熟咗敵人招式套路之後，「危」往往係露出破綻攻擊時機黎
最後亦都係最重要既一點，就係唔好盲目一直按攻擊鍵，最好逐下撳完後，再確認攻擊敵人後既狀態，先再作出下一步攻擊。由於《隻狼》攻擊判定頗為寬鬆，即使攻擊間隔距離稍長，只要敵人處於硬直情況下都係玩家有利，所以盡量學識先確認狀態再攻擊，同埋多觀察、多聽聲、多練習。
擁有極速拔刀術既葦名劍心，細心留意的話就會發現手持劍先會出現「危」狀態，劍係鞘內只會使出拔刀術。
經歷多場戰鬥後，即使依靠自己摸索，擊敗被喻為全遊戲最強三甲既老年版劍聖都只係花咗三十分鐘左右，最緊要係多觀察對手動作
另類壓等方法
總結
係《隻狼》入面，所有人都學習同一樣既系統，大家都係向一個目標前進，無簡單模式、無得叫人幫手、無得屈 LV，因為以上既種種都會剝奪玩家既成就感。但係當你每次死亡，再次面對同一位敵人，而每次存活時間逐少逐少咁增加，眼見成功在望，但係又會偶然因為自己失誤又距離成功遠咗，呢種過程先係《隻狼》最好既體驗。
本來以為《隻狼》既耐玩性會比起《Dark Soul》系列、《Bloodborne》低，因為無法育成角色，唔似上述作品咁可以培育各種唔同玩法角色。不過我錯了，係二周目開始，玩家可以選擇「苦難」模式，係該模式下不但敵人血量、軀幹值大增（自己減少），而且所有擋格動作必須係「完美擋格」先唔會扣血，非常痴線！
所以《隻狼》對於動作遊戲高手黎講，呢隻絕對係一隻夢幻般既高難度遊戲。對新手黎講呢隻遊戲都應該嘗試挑戰，因為係整個遊玩過程中玩家會逐步強化，對玩其他動作遊戲都有幫助。
回帶相關文章：
【劇情討論】《隻狼 SEKIRO》隱喻揭秘：白蛇大神與獅子猿篇
【劇情討論】《隻狼 SEKIRO》源之宮「破戒僧」真身原來係……＃劇透注意
VJGamer總編，細細個已經蒲機舖，機齡甚深，熱愛電玩文化。