【劇情討論】《隻狼 SEKIRO》故事揭秘:鯉魚王慘死有原因!強敵體內不死蟲從何而來?

 

早前同大家討論過《隻狼》強敵「破戒僧」以及「獅猿&白蛇大神」嘅背後隱喻,不過,回歸到遊戲當中設定的話,呢啲敵人並唔係天生就不死的,到底點解狼要用「不死斬」斬佢地先至死,又點解佢地身體入面原來有蟲寄生?

簡單黎講,佢地身體裡面之所以有蟲,原因,係因為人類嘅貪念,污染環境,令佢地受到影響(喂)

 

 

去到遊戲裡面嘅「源之宮」,玩家應該會見到三樣野:

(1)水中有巨大的鯉魚王,假如你就咁過去挑機,應該會慘死的;
(2)水邊有「壺中貴人」向你要求「鱗片(寶鯉之鱗)」
(3)水邊同時有鐘,玩家得到魚糧後可以敲鐘餵鯉魚王

 

 

「壺中貴人」共有兩個,佢地分別都想成為下一任「鯉魚王」,換句話講,「鯉魚王」其實係由人變成的。但係,一次只能有一任魚王,要成為新魚王,就要將舊魚王殺死;所以,玩家交達一定數量鱗片比「壺中貴人」之後,就會得到魚糧。

 

 

魚糧有分幾種,有「尊貴魚糧」,亦有「有毒魚糧」;只要玩家敲鐘,向現任「鯉魚王」投下「有毒魚糧」,咁魚王就會死 : (

 

 

舊任魚王死去,新任魚王上位(未成為魚王嘅另一個貴人亦會死去);咁舊魚王條屍喺水中腐化,就會生蟲。

 

 

講到呢度大家或者已經有概念了,呢啲腐蟲飲「源之宮」嘅水成長,然後,呢啲水正正係遊戲中四個「不死力量」嘅其中一個來源!另外,留意返遊戲中嘅地理位置,源之宮嘅水,係會隨住瀑布,落到水生村,以及獅子猿生活嘅谷底……

無錯!無論係破戒僧定獅子猿,其實佢地都係因為飲左帶有魚王不死屍蟲嘅水,先至會擁有不死嘅力量,仲有埋寄生蟲添 LOL!

所以文初我先話:呢個係一個「因為人類嘅貪念,污染環境」而造成嘅悲劇,亦都係一個惡性循環……。

 

相關文章:

【遊戲感想】解釋你聽點解好玩 神作《隻狼:暗影雙死》難得有道理
【劇情討論】《隻狼 SEKIRO》隱喻揭秘:白蛇大神與獅子猿篇
【劇情討論】《隻狼 SEKIRO》源之宮「破戒僧」真身原來係…… 

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章