E3 2019 正式開鑼！今晨 Electronic Arts 舉行嘅「EA Play」，詳細公佈咗《Battlefield V（戰地風雲 5）》黎緊兩個全新章節嘅內容同埋公佈日期。

Chapter 4「Defying the Odds」正式上架日為 6 月 27 日，新地圖位於「蘇丹（Al Sundan）」呢個處於北非嘅國家，地形既有丘陵地區，亦有河川地域，仲有航空基地以及雷達塔等等。相信對於玩家黎講，係一個可以全面作出各類型合作及全射程戰鬥嘅多元化地圖。

另一張將於 7 月份公開嘅地圖為「Marita」，與 5 月份上架嘅「Mercury」同樣地係位於希臘嘅戰場，不過「Mercury」玩海岸沿線，「Marita」就移師到臨近河川嘅山上面。二戰時期，納粹德國聯同意大利及保加利亞，組成軸心國軍隊一度佔領希臘，今次呢個劇本，就係玩絕地反擊，相信無論玩家使用邊個兵種，都能夠有所發揮。

8 月份共有兩張新地圖，舞台將會分別係 Lofoten Islands（位於挪威嘅「羅弗敦群島」），目標係破壞敵方嘅爆彈工場；另一個地圖則為於二戰期間一度比德軍佔據嘅 Provence（法國南部「普羅旺斯」）。官方話喺網路上面聽取好多玩家意見，知道好多朋友想挑戰「以近戰為主體嘅地圖」，所以相信呢兩張新地圖需要玩家更高嘅合作性，分頭行事真係最緊要眼明手快心夠定呀～。

10 月份新地圖則為「Operation Underground」，於《Battlefield 3》裡面推出嘅「Operation Métro」大受歡迎，工作室以此作為概念，再重新架構出今次嘅新地圖。由於地下通道窄小，似乎係步兵軍種出擊嘅好時候！

至於最令玩家興奮嘅 Chapter 5 將會於秋季登場，戰線正式伸延到太平洋戰爭嘅日美戰爭，首張地圖為「Iwo Jima（硫黄島）」，同時，官方預計今年內仲可以推出多兩張有關太平洋戰線嘅新地圖。

至於《B5》嘅「食雞」大逃殺模式「Firestorm」亦會保持定期更新，預計下次大型 Update 會在六月中進行，相信玩家不日就可以試到新武器同埋新外觀。