【遊戲新聞】高質重現男女主角初遇場景《FF8 Remastered》官方出手(?)終結遊戲 Meme

 

(以上圖片來自《FF Dissidia NT》)相信《Final Fantasy 8》對於好多玩家黎講,都係一份深厚回憶,而《FF8 Remastered》亦都即將於今年內登錄 PS4、PC(Steam)、Switch 以及 Xbox 平台,早前我地亦分享過《Remastered》版本大概會係點;而喺未迎接高清版本之前,不如黎睇返當年嘅名場面。

玩過《FF8》嘅朋友,應該都對女主角 Rinoa(リノア)與男主角 Squall(スコール)於舞會中初次遇見嘅畫面,而 Rinoa 走去同 Squall 講嘅一句「君が一番カッコいいね(You’re the best looking guy here.)」亦都因此成為遊戲其中一個名場面。

 

 

不過當時技術有限,畫面當然比較低清,所以黎到而家,大家發現「the best looking guy」嘅真身其實係以下咁嘅樣,外國網友就好衰仔咁樣將呢個畫面同對白變成網上 Meme……

 

圖片來源:Know Your Meme

 

呢個 Meme 相信之後將會成為絕響!隨住《Remastered》版本越黎越多畫面公佈,Square Enix 官方亦都於 Twitter 上面出左個 Post 抽自己水,將全新高清版嘅呢個畫面預早同一眾玩家分享。

 

 

帖文一出,網友紛紛轉載,佢地都不禁笑言「官方出手整到咁靚,個 Meme 以後唔 Work 啦」咁話。

 

 

遊戲正式發售日期相信馬上就會公佈,作為經典《FF》其中一個回憶嘅《FF8 Remastered》,到底會係點樣,相當令人期待,以下為官方宣傳影片:

 

 

延伸閱讀:
【遊戲新聞】移植 HD 化工作由 DotEmu 負責《FF VIII Remastered》與原版不同逐個睇

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章