香港電腦通訊節 2019 已經於 8 月 26 日正式閉幕，今年會場內依然有大量電競相關比賽活動，我地 VJGamer 於剛剛過去嘅周末，就貼身跟足兩日嘅《Street Fighter V Tournament（街霸 5 比賽）》，是次活動由本地電競比賽搞手 Pentagon HK 與 CGA 共同協辦。

由於美國 Capcom 對香港形勢有所擔心，所以取消咗 Capcom Pro Tour 香港站，不過著名台灣職業選手 Gamerbee 一直關注香港事情發展，早前亦於 Facebook Page 上面表示自己無有怕，只要我地搞比賽，佢就會黎參與，結果佢真係兌現承諾，而本地另一職業選手 Humanbomb 亦大展地主之誼，為 Gamerbee 香港行程貼心打點。

左：Humanbomb；右：Gamerbee

是次比賽，星期六為小組預賽，星期日則為八強決賽，一共有超過八十位選手參與。選手群中有唔少係格鬥遊戲界嘅熟悉面孔，除卻上面提到嘅兩位，仲有 HotDog29、Tse444、Denesis、Chris Wong 等等。

初賽喺副舞台舉行，人頭湧湧

本地選手 Tse444：2017 年 CPT 馬來西亞站亞軍得主

是次比賽最年輕出戰者 Keevin：Humanbomb 的小徒弟、同時也被 Gamerbee 認為潛力無限嘅 13 歲少年！

格鬥遊戲嘅世界入面，無「絕對嘅強者」，亦無「永遠嘅冠軍」。

實力，除左天份，仲要講勤力。勤力唔止拼命同人聯機對戰咁簡單，仲要了解其他角色嘅招式，自己先可以有所準備、有所防範；而最後一樣野，就係選手當日嘅狀態，所以每次睇格鬥比賽，一日未睇到最後，都唔會知結果，絕對係非常具有驚喜性嘅比賽。

成功晉級八強嘅選手，分別為 Gamerbee、Humanbomb、HotDog29、Chris Wong、Denesis、坡蘇、Tse333、以及 Franki。

決賽於電腦節內主舞台舉行

多謝電競界的出色 Caster：Devils 以及格鬥選手 Cody 擔任兩日比賽旁述！

今次嘅比賽都有唔少經典場面，例如同屬 Talon Esports 公司嘅職業選手 HotDog29 與 Denesis 落入同一對戰小組，首輪比賽已經要上演同門師兄弟對決，睇到在場人士份外緊張。

左：Denesis；右：HotDog29

經歷一輪苦戰之後黎到冠軍賽，係 HotDog29 與 Gamerbee 嘅最終對決。正如早前提過，選手嘅心理狀態以及出席大型比賽嘅經驗，都會影響作賽嘅狀態，雖然香港人應當支持本地選手（笑），不過，當日 Gamerbee 表現的確極佳，由敗部一直打到入冠軍賽，而 HotDog29 因為處於勝部，所以等於有「兩條命」。

Gamerbee 初段使用 Cammy 表現一般，但後期轉用野人，表現馬上變得極好。使用 Ibuki 嘅 Chris Wong（季軍得獎者）曾笑言，「如果 Gamerbee 用 Cammy 自己就有可能獲勝，但用野人的話，自己就無勝算了。」

結果，Gamerbee 係中場轉左用野人的。

最後得獎排名如下：

冠軍：Gamerbee（台灣）
亞軍：Talon|HotDog29（香港）
季軍：Chris Wong（香港）

Humanbomb 雖然中途落敗，不過佢本來與一眾選手就老友鬼鬼，所以佢賽後亦向記者笑言，「Gamerbee 今次唔止賺返旅費，仲要叫佢請我地食飯！」

左起：HotDog29、Kim＠Pentagon、Gamerbee、Ryan＠CGA、Chris Wong

我地 VJGamer 總編森麻與 Gamerbee 原來也是相識已久的朋友

筆者也趁機會集郵一枚

今次嘅電腦節《街霸 V》比賽，其實同為 Pentagon HK 旗下格鬥電競比賽「Pentagon Fighters 2019」嘅第二季度賽事，是次比賽中嘅選手，將按名次排位，直接晉級可以參與「Pentagon Fighters 2019」總決賽，至於幾時為第三季度賽事，活動詳情就有待官方公佈。

再次謝謝 Gamerbee 黎參加比賽，亦恭喜你獲得是次比賽冠軍，期待下次活動上面再次見到你！

如果你對香港嘅格鬥電競比賽有興趣，歡迎讚好 Pentagon HK 新成立嘅專頁，佢地會定期公佈比賽詳情以及進行選手召募，格鬥遊戲愛好者們注意啦。