【潮物評測】誠意十足用料上乘 「Mega Drive Mini」送禮自用絕佳之選

近年差唔多部部舊機都出 Mini 版,好聽嘅就係滿足大家懷舊慾,唔好聽嘅就…..。不過作為玩家,如果部機做工掂,跟嘅遊戲吸引嘅話我都係會入的。我地編輯部有幸 R 到部即將推出嘅「Mega Drive Mini」黎玩,即刻話你聽到底部機入唔入得過!

 

「Mega Drive Mini」亞洲行版,不過個盒面都係寫日文嘅

 

收到部機第一樣野就梗係極速拆盒先,先拎部主機出黎望下質素先。睇機身做功都算係唔錯,電源開關有質感,而音量控制鍵雖然無功能純裝飾,但係有做阻力,唔係求其整出黎就算,係幾有誠意。主機用 Mirco USB 供電,一般尿袋已經夠力推,HDMI 輸出,解析度達 720p。跟機有二個手制,拎上手大小同原裝版本感覺相近,按鍵以及十字制同樣還原度十足,質素令人滿意。

 

音量控制鍵推落去有阻力,無交行貨

機頂整返條坑比大家插卡帶落去,不過就純裝飾用(網上有成套帶買,不過價錢就……)

盒背有全收錄遊戲封面

手制大細及質感令人滿意

左邊為初代手制,雖然 Mini MD 手制相比下較細,但手感毫不遜色

 

開機入主畫面,UI 設計都幾簡潔易睇,想快速揀 Game 嘅亦可以將遊戲以側面顯示,有多種語言選擇,包括繁中、英、日文。系統有得比你選擇用 4:3 傳統模式又或者 Full Screen 顯示,亦有得加 Scan line,不過只有一種濾鏡選擇就有少少美中不足。系統由Sega 自家團隊 M2 製作,起動速度快兼且穩定,質素完全唔需要擔心。每隻遊戲都有四個即時存檔位,儲存速度亦都非常快,大家可以放心用 SL 大法。

 

由 M2 團隊負責,基本無野值得擔心

可選擇傳統 4:3 又或者 FullScreen,不過濾鏡就只有一種

每隻遊戲都有四個即時存檔位,頗為充足

 

不得不提嘅係每隻遊戲都會有個小小簡介,當中有部份資訊係對遊戲有返咁上下認識先知道,例如收錄遊戲《洛克人 Mega World》,表面上係「洛克人」1 – 3 代合集,但原來爆晒三代之後會有隱藏關卡「Wily Tower」,有「孫悟空」、「豬八戒」、「沙僧」三師徒打,而呢個資訊喺簡介上會有寫明,足見製作團隊非常細心。

 

每隻遊戲都會有小小簡介,字數雖少但係功課做足,足見用心之處

 

當然大家最關心嘅都係「Mega Drive Mini」內收錄遊戲,玩開懷舊遊戲嘅朋友都話今次誠意十足,好多隻 Game 現時都有返咁上下「身價」,而且有部份遊戲例如《Comix Zone》、《光之繼承者》、《洛克人 Mega World》、《龍少女戰士艾莉西亞》MD 版從未移植過,淨係呢點已經非常值得收藏。

 

遊戲匣帶可以側面顯示

 

「Mega Drive Mini」入面仲有二隻超重點遊戲,分別係《Darius》及《俄羅斯方塊》MD版。前者 1986 年推出街機版,屬於當年 TAITO 最受歡迎嘅射擊遊戲,今次版本就新增有 26 隻戰艦登場嘅特別模式。

 

夢幻之作 MD 版俄羅斯方塊

 

至於《俄羅斯方塊》我諗都唔洗點介紹,但係呢隻遊戲嘅 MD 版其實有段古的。話說當年全球大熱嘅《俄羅斯方塊》街機版其實係由 SEGA 製作的,而且當年 MD 版就連卡帶都做好埋,但最終因為任天堂利用「特別」嘅方法,所以最後家用 / 掌機版本就由任天堂奪得版權,而 SEGA 版本嘅《俄羅斯方塊》就變成絕響。據聞全世界只有極之少量卡帶倖存未被銷毀,之前更有其中一盒卡帶被放上拍賣網站,最終以天價過百萬美金售出,可謂收藏家之逸品。(對呢段古有興趣嘅朋友可以去呢度了解多啲 )

 

實體遊戲帶以天價賣出

 

「Mega Drive Mini」其實真係幾抵玩,實機會喺 9 月 19 日推出,定價為 HKD $560,有興趣嘅就去狗衝返部啦!

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章