【電影感想】有笑有淚有洋蔥《我和父親的FINAL FANTASY XIV》獻給與父親在不知不覺中走遠的我們

 

《我和父親的 FINAL FANTASY XIV》,好好睇。主角與父親之間很多互動,令觀眾先係會心微笑,隨後再發現,這些互動裡面,赫然藏有唔少洋蔥。我一路睇戲,一邊微笑,一邊鼻酸。

主角光生(坂口健太郎飾)係一個普通上班族,與父母、妹妹共同生活。然而,同我地好多人一樣,唔知幾時開始,與父親(吉田鋼太郎飾)變得相對無言。主角父親係典型日本上班族,擁有傳統日本人思想:喺公司賣命工作,希望令家人安居樂業,希望無愧於自己嘅工作。

但係,喺提供豐盛物質生活背後,父親與兒女的關係,亦因為變得極為疏離。《我》電影以主角光生視點出發,光生係《Final Fantay 14》老手玩家,喺遊戲裡面搵到交心同伴,而當初令佢認識《FF》遊戲系列嘅,係佢爸爸,而光生記憶中與父親最親近嘅回憶,就係兩父子半夜一齊成為「光之戰士」打《FF》嘅回憶。

 

 

光生唔討厭爸爸,只係感到無奈,無解,自己都唔知幾時開始,唔識得同爸爸相處。《我》故事就發生喺,原定要升職嘅爸爸,居然辭職、提早退休。光生感到意外,因為佢認識中嘅爸爸,人生只以工作為優先,佢絕對唔會係「想陪多啲屋企人」所以提早退休嘅人。

面對喺家中無所事事、同時心事重重嘅父親,光生做左一個好窩心嘅舉動,就係買左一部 PS4 返屋企,叫爸爸不如玩《FF14》;而呢個其實亦都係光生諗出黎嘅計劃,希望喺《FF14》呢隻 MMORPG 入面,一方面滿足自己「可以再同爸爸一齊打機」嘅想法,同時,佢想知道爸爸嘅諗法。

 

 

唔知大家細個開始打機嘅契機係乜野?我係因為我父母以及兄長都會打機,所以我好細個時,每星期周末晚上,都會同父母一齊打任天堂「灰機」。那時一家相處的回憶是溫暖的,那時的香港生活是舒心的,那時,是快樂的。

或者你與父親嘅共同回憶唔一定係打機,又或者,你根本無玩過《FF 14》;但係,「打機」同埋「FF14」只係一種途徑、一種媒介,去重拾與父親之間嘅回憶。

《我》係真人真事改篇嘅故事,有電視劇版本(而家喺 Netflix 平台上面有得睇),亦有即將於 10 月 17 日於香港上映嘅劇場版電影版本。故事最後,光生係「計劃通」的,爸爸真心愛上左《FF14》嘅遊戲,甚至會買攻略本返黎做筆記,亦都好順利地融入左光生所屬的朋友公會,每日都期待一齊打地城、打頭目嘅時間。

當然,去到劇情最後,大家就會知道,爸爸之所以辭職嘅原因,亦會明白到,面對家人感到「唔知點開口」嘅,唔知光生一個人,爸爸同樣地,其實好想去同兒女修復關係,只係因為面子,因為不擅辭令,令到彼此距離越來越遠。

 

 

電影結局,係美滿的。美滿得令我很感恩這是一個「真人真事」改篇的故事。因為現實中美好的事情已經變得很罕有,與變得疏遠的父親,重新建立互助互愛、互信嘅關係,唔係人人都有機會做得到。

故事精彩固然是吸引點,但係電影裡面嘅細節都不得不提。首先是演員。主角群與 2017 年嘅電視版本並不一樣,電視劇版本主角「光生」由千葉雄大主演。2017 年版本畢竟是劇集,整體節奏都會比電影放慢一點,雖然千葉雄大很可愛,不過演技上還是不夠老練,比起電影版本,相對浮誇一點,所以我比較喜歡電影版嘅選角。

 

 

電影版起用坂口健太郎與吉田鋼太郎飾演父子。相信有睇開日本影視嘅朋友,對於兩位演員都唔陌生了。有「鹽顏美男子」稱號嘅坂口健太郎,相比起 2017 年出演日劇《東京白日夢女》時演技明顯進步許多。「鹽顏」本來就無特別多表情,但係坂口於電影中,每個表情,都自然柔和許多了。飾演一個話不多、有少少毒(笑)嘅草食男子,選用坂口健太郎,實在是不錯的選擇。

 

 

不過,最值得一讚嘅,當然都係吉田鋼太郎。或者我地女性群裡愛稱他為吉田叔。啊……畢竟《大叔的愛》實在紅透半邊天,這個可愛的大叔實在是叫人又愛又難忘。

不過,吉田叔當然是老戲骨了,無論係 2014 年日本晨間劇《花子與安妮》飾演尊重妻子變心而主動離婚的嘉納傳助、抑或《Doctor-X》第四季裡面嘅西園寺醫師、去到為大眾所認識的《大叔的愛》……吉田叔一向擅長飾演外冷內熱、不擅辭令、有些笨拙的角色。所以,今次在《我》電影裡面飾演「不懂得如何表達自己」的 60 歲父親,吉田叔相信是駕輕就熟了吧!

 

 

最後有一點很用心,就係《我》電影中出現嘅《FF14》遊戲片段以及動畫,並無將電視劇版本搬字過紙,而係重新製作的。光生於遊戲中嘅角色,由著名聲優(亦係筆者好喜歡嘅聲優!)南條愛乃小姐聲演……係,同好多打機嘅朋友一樣,男仔打機就會開女角,女仔打機就會開男角(笑)所以光生於遊戲入面嘅角色都係女角黎的。

 

我好奇嘅係,劇組為左電影版,係咪真係去打左一次《FF14》超強頭目雙塔利亞呢?XD

 

商業一點去睇,《我》呢套電影真係《FF14》最佳嘅宣傳之一了。呢隻營運始於 2010 年嘅 MMORPG,我好多年前已經想開坑,但係因為工作忙碌關係,我多次精神上斬自己手指,唔比自己開 Game……儘管我係一個《Final Fantasy》 嘅忠實 Fans,身邊亦有玩《FF14》嘅朋友,我都好堅定;但係,睇完呢套《我》之後,我嗰晚返到屋企,開 PS4,望住日版 PS Store 嘅《FF14》購買頁面,擺出一個碇司令嘅 Pose,沉思左好耐。

我又開始忍唔住想開坑了。

 

這個世界看多少次都是很令人醉心啊…

 

如果你係《FF14》玩家,或者,你只係想重拾與父親一些回憶的美好,又或者,你其實不討厭自己的父親,或者家人,只是因為大家各有各忙而慢慢疏遠了,想再重聚時又不知道如何再打開話題、不知道如何可以修復關係的話……《我和父親的FINAL FANTASY XIV》,係一套非常窩心、有笑有淚嘅溫馨作品。

同埋記得帶定紙巾,眼淺的朋友總有一兩個位置容易掉淚。

《我和父親的FINAL FANTASY XIV》將於 2019 年 10 月 17 日於香港全線上映。

 

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章