【玩物評測】理念是刀槍不入 1/12著衫V煞 開箱簡評

我都幾相信如果冇左《V煞 (V for Vendetta)》呢套漫畫、呢套電影,大家都唔會對火藥陰謀計劃有認識,唔會將 Guy Fawkes 面具成為全球抗爭極權嘅像徵!11 月 5 號係大家生活喺緊急法下第一個月,經歷左 5 個月嘅抗爭,我地要記住唔可以麻目、唔可以遺忘……


好啦!我今日介紹嘅睇嚟好似個小丑,受盡命運殘酷玩弄。但佢不畏強權、挺身而出,發誓鏟奸除惡、伸張正義,為飽受壓迫嘅人民出一口氣。對於極權嘅制裁只有復仇,使用以暴制暴嘅手段,並誓言要拯救水深火熱中嘅民眾。

我冗長累贅嘅介紹到此為只,最後請允許我簡單補充一句,佢係 VMASK。

Bullet Head 1/12 Scale Figure VMASK

向來都極少同大家介紹一啲第三方 Figure 產品,不過今次實在 CP 值奇高之外,仲要喺呢個時勢下收到呢件產品,真係唔可以唔比大家知。先講一個資訊,對上一次有官方受權嘅大約 1/12 Action Figure,已經要數返到 2006 年《V煞》上映時 NECA 幫佢出左隻膠到爆嘅 7 吋Action Figure。 13 年時光雖然係第三方嘅產品,但植髮同著衫呢兩個賣點經已令我一早落訂。

一開箱整整齊齊算基本收貨

呢排興咁樣排晒所有配件開箱,配件唔算多,本體高帽兩對特別手型一支玫瑰以及六把金屬匕首

近距離睇睇個頭雕,連鬍鬚嘅紋理都有埋

明明啲植髮都遮埋隻耳仔可以偷下雞,製造方都有做埋

長袍只需要拆開個頭就可以除落嚟

有讚都有彈嘅,頭髮處理唔算好困難,用手掃一掃其實都可以貼伏,但前陰就真係比電影造型長太多,玩家買左要自己修剪一下

另一缺點,衫袖太闊嘅原故,手套接合衫袖時有機會令衫袖褶皺

腰帶係可以除落嚟,但由電影設定嘅單扣變成雙扣,呢個做法對於固定匕首喺腰間更理想

雙腳皮靴就亦有貼地設計

手型同主體活動性效果非常滿意

擺埋 Pose 比大家睇效果啦!

總括而言,作為第三方廠嘅產品,玩家比唔比機會佢就自行決定。如果有興趣入手嘅朋友就唔洗特登搵明眼人嘅,大家可以向 玩具箱Toy Box 或者 Toys Beat兩間店舖查詢。

阿九

打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast //goo.gl/HRnxDW

追蹤

更多文章