【遊戲評測】小島神降臨!《Death Stranding》打造拯救世界的速遞員!

遊戲界奇才 — 小島秀夫建立自家遊戲公司「Kojima Productions」第一款作品 《Death Stranding(死亡擱淺)》今日面世,究竟小島會唔會再次創造經典,而今次又會為遊戲界帶黎咩衝擊呢?

我地編輯部好慶幸,可以提早兩星期可以玩隻遊戲,作為小島忠粉嘅我,完全無失望,仲有驚喜;但如果你唔係 fans ,睇先前遊戲展嘅試玩片都覺得悶,希望你花少少時間睇下我對呢隻遊戲嘅感受,話唔定會改觀。

以下係遊戲頭三章嘅遊戲感受,點解要咁講明?一方面係官方規定避免劇透,另一方面係……….最後先話你知~

 

 

電影級卡士!電影級劇情!

《Death Stranding》故事設定係未來,世界各地突然無故發生爆炸,生命塗炭,好多好似鬼魂咁嘅怪物「Beached Things 擱淺者」(簡稱 BT)出現,不斷殘害全人類;各地四分五裂,為保命而斷絕世界嘅連結,各國變成死城一樣。

支離破碎嘅美國,組成「United City of America(簡稱UCA)」,而且成立「Bridges」,透過 Chiral Network 連結各大城市,呢個時候有一班 Homo Demons 嘅恐怖分子想阻止 Bridges 嘅行動,仲捉埋前總統個女,你身為主角 Sam Porter Bridges 目的就係運送物資去各城市,說服佢地連結 Chiral Network,仲要救埋前總統個女。

故事大概係咁,當然仲有好多伏線留待大家欣賞。

 

邦女郎 Lindsay Wagner係敵人定幫手?!

 

電影級劇情當然要配電影級卡士,今次遊戲請黎 《 Walking Dead 》型男箭佬 Mark Norman Reedus 擔正男主角,佢唔只配音得個樣,仲親身做埋 motion capture 動態捕捉。

除咗箭佬,遊戲仲搵埋丹麥型男 Mads Mikkelsen 飾演神秘奸角,其它陣容仲有電影 《Pacific rim》導演 – Guillermo del Toro、邦女郎 Lindsay Wagner 等等。

值得一提係日文版《 Metal Gear Solid 》配蛇叔嘅大塚明夫都有份參與配音!而且仲有好多名人客串做 NPC,包括先前有訪問過小島嘅美國名嘴主持人 Conan O’Brien,我話你知正式版遊戲真係有佢!

 

《 Walking Dead 》型男箭佬 Mark Norman Reedus

邦女郎 Lindsay Wagne

丹麥型男 Mads Mikkelsen

電影 《Pacific rim》導演 – Guillermo del Toro

 

送貨!呃 like!再送貨!

呢隻遊戲簡單黎講,就真係送貨!主角要不斷接 Order 去送貨,個個 Order 都要使命必達,講到呢到你可能會話「咁好悶姐,好似芒亨運蛋任咁…..」

小島當然唔會咁簡單,遊戲要你整理好你所有貨物,以及你要用嘅裝備,點解要整理?因為所有貨物同裝備,都會真實呈現係主角身上,有 9 箱貨,就真係要揹住 9 箱貨;遊戲就要考驗你要平均咁裝備貨物,因為會好影響主角步行嘅平衡,貨物疊得太高會令主角好易跌到,一跌可能會令貨物損壞或遺失,導致減分或任務失敗,揹太多貨又會加快扣主角體力。

主角嘅狀態都要去維持,要留意鞋嘅耐久度,定時要飲 monster 補充體力(真係 monster 呀!)除此之外,仲要留意路面情況,你可以 scan 前方路面嘅平坦度,由藍色到紅色,紅色代表崎嶇,主角會容易跌到,係過河道時,紅色代表深水地方,主角會容易遇溺,貨物仲會隨水流而遺失。

玩家要好好運用你手制嘅  L2、R2,佢就代表主角雙手,必要時捉緊背包嘅肩帶平衡自己避免跌倒。遊戲後期仲會有載具,但都唔代表你可以揸車玩哂。

 

所有貨物同裝備都會真實呈現係主角身上

要平均咁裝備貨物係重點

攀山涉水係基本嘢

有車揸當然係爽…

但唔代表可以去到任何地方…….

拎S級係濕濕碎啦 咁就1900個like

升lv不斷有稱號

 

運貨過程中仲要面對天氣同 BT,「死亡擱淺」現像出現後,雨水變成可以加速時間流逝,稱為「時間雨」,貨物會被「時間雨」影響而會加速損壞,所以玩家要加快腳步或搵地方避雨,而玩家到後期仲可預測天氣添。

其中一種BT – 「Gazer」會隨著「時間雨」出現,半透明咁浮係空中,你要靠住你心口嘅「BB」做靈探機,主角背後盞燈照向邊,就代表邊到有「Gazer」,當「Gazer」靠近,就要噤實 R1 閉氣,避免被發現,十足《疆屍先生》,如果不幸被發現便會比「Hunter」拉去另一個地方。

面對另一種 BT – 「Catcher」,類似小頭目咁,主角要靠住用自己嘅特殊血液製造成嘅炸彈去迎戰,名副其實「血換血」。

除咗 BT,仲要面對「謬爾驢人」,佢地都係人類,但因為送貨成癮而會搶人地嘅貨物,主角經過佢地嘅陣營要小心,被發現會傾巢而出,但成功潛入或者擊退,就可以搶返佢地嘅貨物以及載具。每次完成任務除咗得到評分,仲會賺到 like,真係類似 Facebook 果種 like,而主角亦會累積評分而獲得稱號,做一個速遞員 KOL!!!

種種遊戲設定都非常有特色,其它遊戲絕對玩唔到。

 

史上最可愛靈探機 – BB ,必要時要郁下手制氹佢開心

「謬爾驢人」要貨唔要人

可以有非致命武器制服佢地

個人覺得主角 Sam 好打過 Big Boss 一打十無難度

 

一隻無 game over 嘅遊戲

主角有一種特殊能力,名為「回歸者」,主角不幸身亡,主角會去到自己嘅「冥灘」(你當陰間咁意思),你只要控制主角從水底向上游便會翻生。遊戲就用呢個特別嘅故事設定去包裝 game over,令到玩家更加唔似打緊機,更加投入《Death Standing》嘅世界觀。

單機?連機?答案係「多人嘅單人遊戲」

小島秀夫以往都為遊戲界帶黎新類型遊戲,好似佢嘅著名作品《 Metal Gear Solid》就創造咗 「tactical espionage action 」隱蔽類遊戲,而今次就為大家帶黎 「strand game 」羈絆遊戲。

有別於一般連機遊戲,《Death Standing》有一個名為「 social strand system」 ,簡單黎講就係非同步多人連線機制,類似《 Dark Souls 》係遊戲角落留底訊息比其它玩家,但《Death Stranding》更加做多步,其他玩家係遊戲世界嘅建設你都會一一用到,例如修路起橋、以及載具道具都可以「共享」,換言之玩家們真係同劇情一樣攜手修補美國,真係做到 「We Connect 」

講到呢到你一定會諗,你地早兩個星期玩咪起好哂設施,變相好易玩?小島又點會諗唔到呢點,官方係開售前已經停 server,係無玩家持續修建設施嘅情況下,「時間雨」會慢慢侵蝕設施及道具,到正式開售時,我估已經變回荒地。

除咗呢樣之外,地圖會經常有「遺失貨件」,玩家可以透過歸還貨件增加 like 數,但如果你執到「遺失貨件」又唔順路交任,可以委託其它玩家幫你完成,名副其實嘅「多人嘅單人遊戲」。

 

修橋搭路

其它玩家起嘅設施都可以一一睇到

 

整體遊戲感想

今次《Death Stranding》絕對無令我失望。首先,遊戲嘅美術設定非常正,科技同現實嘅比例做得好平均,人設以及故事亦扣人心弦,追看性亦非常高,音樂方面做得十分好,去到某些場口「起歌」亦係電影級製作,難怪小島下一步想製作電影!佢一定無問題。

講到底《Death Stranding》都係一隻遊戲,遊戲性的確比先前嘅作品略為低,但起碼遊戲設定及玩法有新意,一定為遊戲界帶黎新衝擊,與其話《Death Stranding》係一隻遊戲,我就會話佢一件藝術品,要心思體會佢背後嘅意思,先會享受到佢帶黎嘅樂趣。

最後回應返點解呢個評測只係限於頭三章遊戲內容,因為第四章開始會有返《 Metal Gear Solid 》嘅味道,一洗玩味較低嘅氣氛,為免劇透只能講咁多,只可以講,2019 年唔玩《Death Stranding》唔得,值得推介。


 

艾力

幪面超人頭號粉絲,玩具figure 無一不歡,極喜歡玩潛入式遊戲。怎吃也不胖,只因最喜歡「食字」﹗人生座右銘是「自作樂,很快樂」。

追蹤

更多文章