【遊戲新聞】24 年前經典 RPG《Romancing SaGa 3》高清版本家用手機全平台上市

 

Square Enix 於 2019 年 11 月 11 日推出《Romancing SaGa 3》嘅 HD Remastered 版本,全平台登錄,包括 PS4、Nintendo Switch、Xbox One、Windows 10、PS Vita、iOS、Android(Steam 版 11月12 日發售)。

《Romancing SaGa 3》始發於 1995 年,當時對應平台為超任(超級任天堂)。今次嘅 HD Remastered 版本,工作室唔單止將遊戲裡嘅圖像重新繪製,亦有全新嘅地城「暗闇の迷宮」,以及前作並未收錄嘅角色原創劇情。

 

 

玩家於 8 位角色裡面挑選一位去開始劇情,隨住玩家選擇嘅角色,你看待故事嘅眼光亦會不一樣,呢種自由視點選擇系統,係當年出色嘅地方之一。

至於遊戲整體系統同玩法,如果大家有玩過去年大熱嘅復古 RPG《Octopath Traveller(八方旅人)》或者會有少少頭緒,因為《八方》都係向同社呢啲經典作品取經!

 

 

雖然呢隻作品喺咁多年後依然人氣高企,不過今次嘅 HD 版,據聞都仲係殘留左一啲原版特有嘅 Bug,似乎係想比玩家最原汁原味嘅初代感受。如果你當年有玩過原版,相信你今次玩呢隻 2019 年 HD 版本會份外有親切感。

 

 

今次嘅 HD 版本,香港地區亦已同步上架,PS4 版 與 Steam 版同樣做緊八折優惠,售價為 HKD 181.6,不過 PS4 版就中英日文對應,Steam 版就只提供英日兩語。Switch 版售價為 3,500円,不過日本玩家表示 Switch 版遇到嘅新 Bug 頗多,各位讀者自行選擇你喜歡嘅平台啦。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章