【遊戲新聞】麻枝准老師回歸帶來催淚新作《Heaven Burns Red》對應手機平台 Fans 感不安

 

鍾意玩 AVG 嘅朋友,相信你同我一樣對於「Key 社」以及「麻枝准老師」有著濃濃嘅敬意。無論係永恆經典《Air》抑或《CLANNDED》,我地嘅青春期都一定曾經為呢啲作品落淚過。

Visual Art’s(Key 社所屬公司)於 11 月 28 日就於網上宣佈,即將與 WFS 合作開發全新遊戲作品《Heaven Burns Red》,對應平台為手機。

 

 

《Heaven Burns Red》為麻枝老師 13 年來首隻新作,佢將在擔任遊戲原作、劇本構成以及音樂製作三大部份;角色人設則由《不思議鍊金術士》系列畫師ゆーげん老師負責。目前官方網站上面公開左遊戲嘅主題歌「Before I Rise」,由やなぎなぎ主唱。

 

 

遊戲預計 2020 年正式上架,係一隻 RPG 風格遊戲。目前故事大綱以及其他資訊都尚未公佈,不過新遊戲登場消息一出,已經於網上引起熱烈討論。一眾 Key Fans 當然因為麻枝老師有新作而感到高興,但係對於對應平台為手機,大家都不約而同感到不安。

隨住手機盛行,近年日本 PC 向 AVG 遊戲已經式微,所以唔少廠商都轉移平台,將遊戲搬到手機上面。不過,平台唔同,遊戲的質感都會變得有點不一樣。

麻枝老師就表示,佢好清楚玩家嘅擔憂,但係佢亦表示, PC 平台小說嘅全盛期已經過去,所以佢地會努力地於手機平台上面,創作出依然帶比玩家感動嘅遊戲。

到底遊戲日後發展如何,就等我地一齊期待吧。

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章