【遊戲感想】因為執念而產生嘅時空旅行《十三機兵防衛圈》非動作類遊戲神作無誤

 

由香草社開發、ALTUS 發行嘅新作《十三機兵防衛圈》,日文版於 2019 年  11 月 28 日推出,而繁體中文版本亦於 2020 年 3 月 19 日上市。

《十三》於日本方面評價頗為兩極,有玩家話故事太深睇唔明,有玩家話無動作元素所以比得好低分(大家有興趣可以上 Amazon JP 睇下);但係另一方面,亦有極大比數玩家表示「一玩停唔到」以及故事極為吸引。

 

 

認真,如果你唔習慣日系 AVG 文字型遊戲嘅節奏,又或者你係追求爽快機械人激戰體驗嘅話,呢隻《十三》相信未必適合你口味;不過,如果你鍾意科幻題材嘅劇本,例如係末世、複雜人、平行時空等等主題的話,呢隻《十三機兵》,我個人會認為係今年非動作類遊戲嘅神作之一。

 

 

故事以 13 位主人翁各自嘅視點展開,劇情線互相交疊,所以每位角色嘅劇情推進,可以話係彼此交錯。

《十三》並唔存在「角色 A 揀左一個選項,就會影響角色 B 嘅命運」嘅設定,以劇情安排黎講,無論玩家以邊個角色開始遊戲先,去到遊戲中盤,都會有既定要求,要你要完成某啲戰爭、或者要同時推進埋另一角色嘅故事線等等,先可以解鎖原本角色嘅劇情。

 

 

呢篇感想文我會盡量唔劇透的,畢竟劇本係《十三》最吸引人嘅地方。但係,對於未玩過、或者係唔知故事講乜嘅朋友黎講,我諗,我可以做一個小小的暗示:

有無諗過你生活緊嘅世界,原來係一個假嘅世界?
有無諗過你身邊認識嘅人,佢地係咪真實嘅存在?

又或者,簡單啲,你信唔信平行世界,又信唔信因果論?

 

 

《十三》機兵嘅世界觀,背後,就係包含住以上好多理念。

當然,理念喺遊戲中展示嘅時候,大多經由角色對白以及情節帶出,從而變得簡化,畢竟香草社創作《十三》,唔係想為玩家帶來一個造作而艱澀嘅故事。

的確,《十三》文字內容眾多,玩家都真係要用心去消化。

 

 

不過,遊戲嘅手繪美術風格非常精緻,配合輕量動畫畫面,我相信你會同我一樣,好快就投入喺呢個引人入勝嘅世界觀入面;同埋,明明係 2D 遊戲,但係畫面嘅層疊以及角色嘅表現,都令到遊戲極為立體,呢一點請大家用心感受下。

另外,本文作者其實玩哂日文同埋繁中兩個版本,以一個故事性咁強嘅遊戲黎講,《十三機兵》嘅中文翻譯做得貼地而不失原版神髓,所以各位玩家唔需要擔心語意失真之類嘅問題。

 

 

人物方面,話就話係有 13 個角色,不過就唔代表只有 13 種人物面貌或者身份……再講落去就劇透(喂)

總之,《十三》喺人物構成以及劇本創作方面,真係落足左心機,一日唔玩到最後,你都唔會知道所有事情嘅真相;而 13 位少年少女嘅角色嘅人際關係,亦都係《十三》嘅重頭戲之一,充滿左青春期嘅醍醐味。

 

緒方稔二(聲優:關智一)&如月兔美(聲優:MAO)係我幾鍾意嘅一對 CP

 

可能你會問,咁多角色,到底邊個係真・主角?我諗我都答你唔到,因為每個角色於故事嘅唔同年代,都各自擔任非常關鍵嘅崗位;我亦好難答到你,我最鍾意邊一個角色,畢竟作為「人類」,大家都會有私心同埋執著嘅位置,唔會有一個角色係完美的。

而「執著」,其實亦係《十三》遊戲其中一個非常核心嘅主題。如果唔係因為部份人嘅「執著」,或者世界已經滅亡。

 

 

例如藥師寺恵呢個角色(CV. 內田真禮),玩佢嘅路線嘅時候,開頭,我一度覺得佢好煩;同埋正正係因為佢嘅偏執,將好多人捲入事件裡面;當然佢好多行為都係源於一份執念,希望所愛之人可以回到自己身邊嘅執念。

冬坂五百里(CV. 種崎敦美)同埋「森村」呢個角色,可以話係遊戲裡面我好感最高嘅人物之一,一來佢嘅身份同埋戲份非常關鍵,二來佢嘅唔同身份,於遊戲中真係好鬼突出,同埋我銀白髮控(喂)

每位角色性格嘅優點與缺點,都會驅使佢地進行一啲行動,而每一個行動,都係構成《十三機兵》故事嘅獨立碎片。

 

準備召喚機兵的藥師寺惠

 

《十三》嘅遊戲方式分成三部份,包括角色探索、機兵戰鬥、以及資料總合三部份。

角色探索路線裡面,玩家嘅唔同選擇,都會觸發角色路線嘅分歧。雖然呢啲分歧,最後都會帶領你去路線嘅終點,不過某幾個角色(例如緒方稔二路線,要配合時間/次序,喺月台上面搵到真相去阻止死亡事件,我覺得非常有心思)嘅選項,都幾考玩家腦力同反應,所以就算《十三機兵》係文字型遊戲,都唔代表淨係一味向前衝就 OK。

 

 

機兵戰鬥方面,亦係《十三》比較受玩家批評嘅地方,就係今次香草社唔用動作戰鬥,而係一種類似即時戰棋形式嘅塔防系統。簡單黎講就係要保護中央塔,不過每個關卡有額外條件要達成,例如係指明要邊幾個角色出戰、又或者係要將損害值維持喺某個數值等等。

系統本來做得好全面,例如係每個人嘅機兵能力值、以及戰鬥技能都要分開逐樣升級,而每個角色都有定位,例如遠攻近攻、或者專打空中敵人咁樣。

 

 

不過,因為玩家可以重玩舊關卡去刷點數幫角色/機兵升能力值,所以,其實都幾建議玩家開 Game 揀 Hard 難度,先至最感受到《十三》戰鬥嘅難度;如果係玩 Easy 或者壓等玩嘅,趣味相信會遜色不少。

缺點還是有的。由於戰鬥係即時反應形式,所以去到後期,敵我雙方同時進行攻擊、畫面較多特效出現時,偶爾會有 Drop Frame 現象出現,呢部份做得比較失色。

 

畫面一花就好容易有少少 lag

 

綜觀黎講,《十三》係一隻令人頗為滿足嘅作品(我本身已好鍾意科幻題材),不過,因為無分歧結局嘅關係,一周目就可以完食,所以就談不上什麼耐玩度了。故事完結之後會有新戰鬥關卡可以挑戰,有興趣嘅朋友可以去挑戰一下。

 

 

科幻題材嘅遊戲有好多,但係以劇本黎比較的話,《十三機兵》絕對係出色嘅一群。對於玩慣 FPS 或者即時動作嘅朋友黎講,或者你好難理解「一個文字型戰棋遊戲,有咩咁好玩?」;不過,我身邊有唔少朋友,玩過 Demo 之後,就迷上了呢個遊戲。

是的,遊戲嘅繁體中文版本 Demo 已經於 PlayStation Store 上架,假如你想感受一下遊戲整體操作感覺,先來個試玩版吧?

《十三機兵》並不完美,但予我震撼良多。希望你也像我一樣,喜歡上這個作品:)

以下為官方中文版的 Trailer:

 

 

本文由編輯部成員神婆撰寫。