玩電腦即時戰略 Game 有返咁上下機齡嘅朋友，仲記唔記得廿幾年前出過個即時策略系列《Commandos》？自 2003 年《Commandos 3》之後就再冇即時戰略新作，呢個系列就隨住 2006 年第一身射擊《Commandos: Strike Force》嘅失利而消失得無影無蹤。雖然大家依家都可以喺 Steam 度玩得返《Commandos》成個系列，但講緊十幾廿年前嘅設定同畫面，有心想玩都的確有少少卻步。但係今個農曆新年假期，大家可以玩得返高清重製版嘅《Commandos 2》。

由 Yippee! Entertainment 重新製作嘅《Commandos 2 – HD Remaster》，遊戲性同玩法冇改過，都係每關用指定角色配合獨有嘅角色技能去完全任務。而高清化加上重新製作嘅遊戲介面，唔知會唔會令新一代玩家重新投入呢個當年風靡一時嘅即時戰略系列？

《Commandos 2 – HD Remaster》嘅 PC 版就會於 1 月 25 號喺 Steam 上架，而 PS4、Xbox One 同 NS 版就會喺今年春季發售。