【試玩感想】中古世紀蝦蝦霸霸《Rustler》惡搞抵死直迫GTA

Rustler》呢隻擺明向 《GTA》致敬嘅作品,只要你喺 Kickstarter 支持 $25 加幣(約港幣 $147)嘅 Package,你就可以喺完成眾籌後得到《Rustler》嘅數位版之外,仲可以喺確定支持後 48 個鐘內收到呢個 Alpha Version 試玩版。(文章尾有完整試玩片段)

呢個試玩版包括嘅任務同 《GTA》啲初期任務接近一樣,教你搶”馬”、點樣洗白逃離通緝、打家劫舍幫人收下數、做保鑣護送等等基本野。雖然冇啲好似佢預告中咁誇張嘅惡搞畫面,但故事情節係抵死兼惡趣味滿分,而且你係熟悉歐美一啲流行文化,會見到好多彩蛋喺故事當中出現。

呢個樂師會唔會太 M 呢?

喂,呢首歌……中世紀就有人唱?!

唔識佢地三個?上 Netflix 睇返《踎低噴飯的飛行馬戲團 (Monty Python’s Flying Circus)》了解下

操控上無乜挑剔,不過因為有氣力計,所以就唔可以好似《GTA》咁喪跑同攻擊。而遠程武器就得把十字弩比玩家試用,不過佢準繩度差到行埋去揮劍好過啦!而遊戲中嘅載具就得馬車,唔同啊馬匹都有住唔同嘅速度,想要隻快馬嘅話就要認住啲馬鞍嘅顏色同圖案。通緝狀態同大家熟知嘅一樣,一個通緝令只要唔比警察搵到,過一排就會消失,而兩個以上就要搵「馬廄」洗白。

咁近瞄住都可以 Miss……

雖然 Alpha Version 可玩嘅地圖暫時只係遊戲嘅一少部份,不過喺城鎮入面嘅場景設計可以話係古今文化大融合,玩家唔會睇唔明啲設施用意,同時你亦會有種喜感喺當中。

停馬場?有冇代客泊馬啊?!

點解有紅綠燈同斑馬線架XD

Rustler》暫時呢個試玩入面要玩晒所有主要任務,快手上嚟都要成個幾鐘,而且玩完之後仲可以比玩家繼續「地氈式探索」,唔會即刻 Lock Game 都算係良心。而整體試玩後的確係非常收貨,而且隻 Game 依家最平嘅 Package 都只係收你 $15 加幣(約港幣 $88),可惜暫時未聽到佢地會製作家用機版本,否則吸引力應該會更大。正式版最快要等到今年十月,想試玩嘅就要快手,開頭所講嘅 $25 加幣 Package 名額有限,滿額之後想早啲試玩嘅就要 $30 加幣(約港幣 $176)。

《Rustler》Kickstarter 傳送門

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enought! Lego Enthusiast https://goo.gl/HRnxDW

追蹤

更多文章