【遊戲新聞】武漢肺炎打擊遊戲業界・主要廠房停止運作任天堂 Ring Fit 供貨緊張

 

大受歡迎兼一環難求嘅任天堂 RingFit 相信黎緊供貨會繼續緊張!當然編輯部絕對唔建議大家要喺香港買兼食炒價,益藍店又用多左錢;不過,如果喺經外海網購返香港嘅朋友,可能你都會發現日本 Amazon 上面嘅標價一直水漲船高,咁係因為產品真係非常好賣,所以供不應求。

雖然相信讀者朋友們,目前最關注嘅絕對係武漢肺炎(我地係咁叫架啦,唔會改叫乜野新冠狀),最想撲嘅,都係口罩同酒精;不過,假如你都仲係一直留意住 RingFit 嘅供應,任天堂於 2 月 6 日就出左聲明,表示「由於中國內部爆發大規模疫症,所以 Nintendo Switch 本體機、Joy-Con 配件、以及 RingFit 等等產品都有生產遲延嘅問題,希望各位玩家諒解」

 

 

同時,根據外國經濟媒體 Business Insider 推算,原定今年推出嘅  PS5 以及 Xbox Series X 大部份生產線都於中國境內,武漢肺炎嘅出現,都好可能影響兩部新機種嘅生產,官方對呢個消息就暫時未作出回應。

武漢肺炎去到而家都仲處於不斷漫延擴散嘅狀態,不過按香港政府嘅處理手法,各位讀者都係自求多福、自己保護自己吧。祝大家身體健康!

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章