【遊戲新聞】《Anthem》終極補鑊 官方正式宣佈遊戲重新設計

大家記唔記得無耐之前我地有報導過一單新聞,內容係 BioWare 內部傳出《Anthem》(冒險聖歌)將會作出巨大改變,並且會聯同多個工作室携手補鑊。雖然 BioWare 同其他工作室合作呢個消息並未得到確定,但係日前官方正式發文,表示會重新設計《Anthem》,同之前嘅消息不謀而合!

 

 

BioWare 日前於官網發文,內容大意係聽到大家嘅意見,「終於」意識到要重做遊戲核心機制,令玩家有更清晰目標、更有意義嘅遊戲挑戰以及相應嘅獎厲,當然亦會對升級系統作出大量改動。但同時佢地亦會保留返原有嘅未來背景設定,以及喺廣闊空中飛行嘅樂趣。(前提係唔洗 Load 餐死先)

 

 

另外現時版本嘅《Anthem》依然會繼續營運,佢哋會通過活動、商店更新以及過去嘅大災變內容黎保持遊戲正常進行。而當新版本《Anthem》完成後,就會用黎取代現有版本,唔知大家又會唔會比多次機會 BioWare 呢?

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章